Կրակում էին, հիմա էլ լացում են՝ է՜ չկրակեիք. սահմանին լարված է եղել, հակառակորդը լռեցվել է

Armtimes.com-ը գրում է.

Լեռնային Ղարաբաղի եւ Ադրբեջանի սահմանին՝ հատկապես Մարտունու պաշտպանական ուղղությամբ իրավիճակն անցած գիշերվանից սկսած մինչեւ այսօր կեսօր լարված է եղել: Այդ մասին մեզ հետ զրույցում տեղեկացրեց կինոռեժիսոր Արշակ Զաքարյանը, որն այնտեղ է՝ իր հեղինակային «Դիրքերում» հաղորդման շրջանակներում:

Վերջինս ֆեյսբուքյան իր էջում իրավիճակի վերաբերյալ հետեւյալ գրառումն էր արել. «Կրակում էին, հիմա էլ լացում են... է՜ չկրակեիք)))»: Մեր զրույցում Զաքարյանն ասաց, որ տեղի ունեցածի մասին կա ՊԲ տարածած հաղորդագրությունում:

- Պարոն Զաքարյան, արդյոք ձեր գրածից կարելի՞ է ենթադրել, որ հակառակորդը զոհեր ունի:

- Դա ենթադրություն է, աչքովս չեմ տեսել, բայց պատկերացնում եմ, որ այդպես է, ելնելով իրենց վիճակից:

- Ի՞նչ նկատի ունեք:

- Այստեղից հեռախոսով շատ բան իրավունք չունեմ խոսելու:

- Իսկ կարո՞ղ եք ասել՝ այս պահին իրավիճակը հանգի՞ստ է, հայ զինվորների մոտ տուժածներ չկա՞ն:

- Մեզ մոտ ամեն ինչ նորմալ է, ոչ մի խնդիր չկա մեր տղաների մոտ: Իրենց (ադրբեջանցիների-խմբ.) մոտ նույնը չէի ասի:

- Շարունակվո՞ւմ են կրակոցները:

- Չի շարունակվում, լռեցվել է, մեր տղերքի ճնշման տակ դադարեցրել են գործողությունները: Շատ են նեղվել, իսկ մեզ մոտ ամեն ինչ նորմալ է:

Նշենք, որ ԼՂ ՊԲ այսօր տարածված հաղորդագրությունում ասվում է. «Դեկտեմբերի 21-ի լույս 22-ի գիշերը ղարաբաղա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից շարունակել է խախտել հրադադարի պահպանման ռեժիմը: Առավել ինտենսիվ խախտումներ են գրանցվել Մարտունու պաշտպանական ուղղությամբ, որտեղ բացի ինքնաձիգերից եւ գնդացիրներից, կիրառվել են նաեւ դիպուկահար հրացաններ: Ընդհանուր առմամբ, ադրբեջանական զինուժն առաջնագծի ողջ երկայնքով հրադադարի ռեժիմը խախտել է մոտ  45 անգամ՝ հայկական դիրքերի ուղղությամբ արձակելով ավելի քան 800 կրակոց:

ՊԲ առաջապահ ստորաբաժանումներն, առանց պատասխան գործողությունների դիմելու,  շարունակել են պատշաճ զգոնությամբ իրականացնել իրենց առջեւ դրված մարտական խնդիրը: