Երբ չունես ասելիք, խայտառակվում ես. Նիկոլ Փաշինյանի «դժբախտ ու դժգույն» պատասխանը
ՎԵՐԼՈՒԾՈՒԹՅՈՒՆՆԵՐ
Հայաստանի Հանրապետության վարչապետի պաշտոնը զբաղեցնող Նիկոլ Փաշինյանը շարունակում է պնդել, որ Շուշիում 30 տարվա ընթացքում բնակելի շենքեր չեն կառուցվել։ Այդ հայտարարությունը նա արել էր Լիտվայում հայ համայնքի հետ հանդիպմանը։ Ազգային ժողովում կառավարության հետ հարց ու պատասխանի ժամանակ «Պատիվ ունեմ» խմբակցության պատգամավոր Տիգրան Աբրահամյանը պարզ և հստակ մեջբերեց, թե ինչեր են կառուցվել վերջին 3 տասնամյակում Շուշիի տարածքում՝ համալսարաններ, սպայական շենքեր, բնակելի շենքեր, Կենտրոնական բանկի մասնաճյուղ և այլն, և հարցրեց Նիկոլ Փաշինյանին, թե ի՞նչ է նա կարծում, արդյոք շարունակում է մնալ նույն կարծիքին և պնդում է, որ Շուշիիում ոչինչ չեն կառուցել ։ Դժգույն և դժբախտ քաղաքի մասին իր հայտարարությամբ հայտնի Փաշինյանը հերթական անգամ փորձեց բառացիորեն «լեզվին տալ»։
«Խոսքը բնակելի տների մասին է, այն ինչ տեսնելու էր ես տեսել եմ և ինչ ասել եմ, որևէ կասկածի տակ դրվել չի կարող, իմ այդ հայտարարությանը ավելացնելու ոչ մի բան չունեմ»,- ակնհայտորեն նյարդայնացած ասաց Նիկոլ Փաշինյանը։
Երբ Տիգրան Աբրահամյանը շարունակեց պնդել, բնականաբար, Նիկոլ Փաշինյանն անցավ իր սիրելի հնարքին, հիշեց նախկիններին ու Բադեն-Բադենը։
«Եթե այդպես է նայեք, թե ինչ ծավալի ներդրումներ են արվել Շուշիում և Բադեն-Բադենում, եկեք տեսնենք այդ ներդրումները, որևէ համեմատության եզր ունեն, ինչ եք հետապնդում այդ հարցերով, Ձեզ թվում է միայն ես ու Դուք ենք եղել Շուշիում, չեն տեսել մարդիկ, թե ինչ իրավիճակ է»,- ասել է Փաշինյանը։
Ավելին նա շարունակեց, թե Շուշիում արած ներդրումները Երևանի «Հաղթանակ» զբոսայգու մոտ կառուցված երեք-չորս տների գնի չափով են եղել։ Տիգրան Աբրահամյանին ազգային ժողովի նիստը վարող Ռուբեն Ռուբինյանը, իհարկե, չթողեց շարունակել, պարզաբանել, որ վարչապետի պաշտոնը զբաղեցնող անձը պարզապես շարքային ստախոս է և չի կարողանում պատասխան տալ նույնիսկ իր արտահայտությունների և բառերի համար։ Իսկ Նիկոլ Փաշինյանին և նրա կողմնակիցներին թվաց, թե հերթական անգամ կարողացել են մոլորեցնել բնակչությանը, խաբել, հայտարարել, թե Շուշիում իսկապես ոչինչ չի արվել։ Եվ այժմ Նիկոլ Փաշինյանը և իր կողմնակիցները շարունակելու են ժողովրդի աչքերին թոզ փչել, համոզել, թե Շուշիում, Արցախի այլ վայրերում համապատասխան ներդրումներ չեն արվել, ուստի և որևէ խնդիր չկա դրանք ադրբեջանցիներին փոխանցելու։ Իհարկե Ադրբեջանը բավարար միջոցներ ունի մեկի փոխարեն տասը շենք, մեկ թունելի փոխարեն տասնյակը կառուցելու համար։ Սակայն խնդիրն այն է, որ մենք գործ ունենք «ստախոս» իշխանության հետ, որը փորձում է ամեն ինչ մանիպուլացնել սեփական իշխանությունը երկարաձգելու համար։
Կարեն Աղայան
