«Քաղպայմանագիրը» ներկայացրեց իր նոր թեկնածուներին

«Քաղաքացիական պայմանագիր» կուսակցությունն ուշ գիշերին ներկայացրեց իր թեկնածուների հերթական խմբաքանակը, որ նոյեմբերի 14-ին գրոհելու են Իջևան, Ստեփանավան և Կապան քաղաքները։ Փաշինյանի թիմը Իջևանում ներկայացրել է Արթուր Ճաղարյանի, Ստեփանավանում՝ Արմեն Գրիգորյանի, Կապանում՝ ԱԺ պատգամավոր Դավիթ Դանիելյանի թեկնածությունը։ Հովանավորչության ու ԽԾԲ-ի անթույլատրելիության մասին տարփողող թիմը, փաստացի, ՏԻՄ ընտրություններում իր համամասնական ընտրացուցակների ղեկավարումը հանձնարարել է մի հայտնի ՔՊ-ականի ընկերոջը, մյուսի սանիկին, երրորդի՝ ․․․։

Արմեն Գրիգորյանը Ստեփանավանի քաղաքապետի պաշտոնակատար էր նշանակվել պատերազմից հետո՝ ացած տարվա նոյեմբերի 25-ին, Արթուր Ճաղարյանն էլ Իջևանի քաղաքապետի պաշտոնակատար՝ այս տարվա ապրիլի 8-ին։ Գրիգորյանը փոխվարչապետ Սուրեն Պապիկյանի հովանավորյալն է, վերջինս հայրենի քաղաքի ղեկավարումը չի ցանկանում զիջել որևէ այլ անձի։ Արմեն Ճաղարյանն էլ մտերիմ հարաբերություններ ունի Փաշինյանի քավոր, Տավուշի մարզպետ Հայկ Ղալումյանի և նրա պատգամավոր եղբայր Վահե Ղալումյանի հետ։

Տևական ժամանակ լուրեր էին շրջանառվում, թե Իջևանում թեկնածուն լինելու է Փաշինյանի եղբորորդի Սիփան Փաշինյանը, սակայն նա իզութոզով կորել է, չի ցանկանում մասնակցել քաղաքական պրոցեսներին։ ԱԺ պատգամավոր Դավիթ Դանիելյանը վարչապետի աշխատակազմի ղեկավար Արայիկ Հարությունյանի ընկերն է։ Իշխանափոխությունից հետո եղել է Հարությունյանի օգնականը, իսկ ԱԺ վերջին ընտրություններից առաջ մի կարճ ժամանակ աշխատել է որպես ՊՎԾ ղեկավարի խորհրդական։ Կապանի գործող քաղաքապետ, ընդդիմադիր Կարեն Փարսյանը քանիցս ահազանգել է, որ Դանիելյանը, դեռ քարոզարշավը չսկսած շրջում է Կապանում և հարակից բնակավայրերում, ներկայանում որպես ՔՊ-ի թեկնածու և քարոզարշավ իրականացնում։ Ստեփանավանում և Իջևանում իրենց մարդկանց պաշտոնակատար նշանակելով՝ «Քաղաքացիական պայմանագիրը» ցանկանում է անխնա օգտագործել վարչական ռեսուրսը, պետական միջոցներով ընտրակաշառք բաժանելով՝ ապահովել նորածիլ ՔՊ-ականների հաղթանակը։ Ամենաբարդը Կապանում է լինելու։ Կարեն Փարսյանը մեծ հեղինակություն է վայելում իր քաղաքում, իսկ Դանիելյանին միայն որպես Արայիկի ընկեր են ճանաչում։ Ամեն դեպքում, փաստենք, իշխանության ղեկին կառչած ուժը շարունակում է խնամի-ծանոթ-բարեկամ արատավոր պրակտիկան՝ պրոֆեսիոնալներին առաջ մղելու փոխարեն։

Տիգրան Հակոբյան