Ղազինյան-Փաշինյան՝ 6:0

Ազգային ժողովի պաշտպանության և անվտանգության մշտական հանձնաժողովը երեկ կայացած նիստում 6-րդ անգամ չընտրեց ընդդիմության թեկնածու Արթուր Ղազինյանին հանձնաժողովի փոխնախագահի պաշտոնում։ Արթուր Ղազինյանն ու ընդդիմության մյուս ներկայացուցիչները իշխանությանը մեղադրեցին հանձնաժողովի աշխատանքը միտումնավոր ձախողելու, Գորիս-Կապան ճանապարհի վերաբերյալ հանձնաժողովի արտահերթ և օրենքով նախատեսված նիստը խափանելու և այլ մեղքերի մեջ։ Իշխանության ներկայացուցիչները միայն գլուխներն էին տմբտմբացնում և փորձում հերքել իրենց մեղքը։ Ավելին , նրանք կրկին պնդում էին, որ Արթուր Ղազինյանը պետք է պատասխանի իրենց հարցերին։ Արթուր Ղազինյանը նշեց, որ 6 նիստ շարունակ իրեն տվել են 18 հարց, ստացել 18 պատասխան և ինքը, ըստ էության, պատասխանել է բոլոր հարցերին և հրաժարվեց շարունակել նիստը այդ պայմաններում՝ իշխանությունից պահանջելով հարգել ինքն իրեն և ըստ Դոնթի բանաձևի հաստատել ընդդիմության ներկայացուցչին։

«Հայաստան» և «Պատիվ ունեմ» դաշինքների պատգամավորները լքեցին նիստերի դահլիճը, ինչից հետո Անդրանիկ Քոչարյանն ու նրա ենթակաները նախ ընդդիմությանը մեղադրեցին Ռոբերտ Քոչարյանի հրահանգով հանձնաժողովի աշխատանքը խափանելու մեջ, ապա կրկին միահամուռ դեմ քվեարկեցին Արթուր Ղազինյանի թեկնածությանը։ «Հայաստան» դաշինքը հայտարարել է, որ կրկին առաջադրելու է Ղազինյանի թեկնածությունը, իսկ իշխանությունը միջոցներ է մտմտում, որպեսզի կարողանա կանխել այդ զարգացումը։ Նման պայմաններում պաշտպանության և անվտանգության մշտական հանձնաժողովը չի կարողանում պարզապես անցնել 44-օրյա պատերազմի հանգամանքների ուսումնասիրությանը և ամբողջությամբ խափանվում է հանձնաժողովի աշխատանքը։ Իսկ Արթուր Ղազինյանը հերթական անգամ, արձանագրենք, հաղթեց իշխանությանը իր սկզբունքային դիրքորոշմամբ։ 

Մարտին Հակոբյան