Նիկոլ Փաշինյանի ականապատ դաշտը

Միջազգային դրությունը Հայաստանի շուրջ ականապատ է։ Վարչապետի պաշտոնը զբաղեցնող Նիկոլ Փաշինյանն այս արձանագրումն արել է Լիտվայում, հայ համայնքի հետ հանդիպմանը, հավելել, թե այդ դաշտը միշտ էլ ականապատ է եղել, այլ բան, որ ականների խտությունն ավելանում է։ Փաշինյանն, իհարկե, մեկուկես ժամ տևած հանդիպմանը փորձել է պատերազմում պարտության ողջ մեղքը բարդել նախկինների վրա, հայտարարել, թե վատ բանակցային ժառանգություն է ստացել նախկիններից, և 1999 թվականից հետո պայմանավորվածություններ էին ձեռքբերվել, որոնք ինքը չէր կարող չեղարկել։

Գայթակղությանը չդիմանալով՝ Փաշինյանը նախկիններին մեղադրել է ընդհուպ հայ-իրանական հարաբերությունները սրելու մեջ, իբր դաշնակցական մամուլում հոդվածներ են տպագրվում Հայաստանի գործող իշխանությունների դեմ։ Հանդիպման մասնակիցները կլանված լսել են Փաշինյանին, որևէ մեկը չի հետաքրքրվել, թե ինչու Հայաստանի իշխանությունները՝ ի դեմս Փաշինյանի, իրավիճակը մեղմելու փոխարեն այն ավելի սրեցին «Արցախը Հայաստան է և վերջ», «Նոր պատերազմ՝ նոր տարածքներ» ճոռոմախոսություններով։ Փաշինյանը, քիչ է մնացել, դրվատանքով խոսի Ադրբեջանի նախագահ Իլհամ Ալիևի մասին, հայտարարել, թե պատրաստ է նրա հետ հանդիպել, փոխանցել ականապատ դաշտերի քարտեզները՝ ռազմագերիների դիմաց։ Ընդ որում, բոլոր գերիներին՝ բոլոր քարտեզների դիմաց։

Ըստ էության, Նիկոլ Փաշինյանը շարունակել է իր խաղաղասիրական քարոզը, տարածաշրջանային կոմունիկացիաները բացելու քաղաքականության հռչակումը, սակայն ամեն կերպ մոռանում է նշել, թե ինչ վտանգներ են սպասվում Հայաստանին։ Ականապատ դաշտերի մասին արտահայտությունը, փաստենք, թևավոր կարող է դառնալ։ Փաշինյանը ոչ միայն Հայաստանն է տանում ականապատ դաշտերով, այլ ինքն էլ ականապատում է մեր երկրի վերականգնման և զարգացման բոլոր ուղիները՝ այսկերպ զրկելով զարգանալու և ուշքի գալու շանսից։ Իսկ սփյուռքում կառույցներին իրար դեմ հանելով՝ շատ ավելի վտանգավոր և գարշելի խաղեր է տանում։

Արթուր Զաքարյան