Թուրքիայի խոստովանությունը․ ո՞վ է Արցախյան պատերազմի իրական հրձիգը

Արցախյան 44-օրյա պատերազմից հետո Թուրքիան թեև հիպերակտիվություն էր ցուցաբերում կարգավորման գործընթացում, բնականաբար Ադրբեջանի կողմից, սակայն փորձում էին հնարավորինս հերքել պատերազմական գործողություններում թուրքական ներգրավվածությունը՝ նշելով, թե ընդամենը տեխնիկական և նյութական աջակցություն են ցուցաբերել։ 

Թուրքիայի նախագահի խոսնակ, գլխավոր խորհրդական Իբրահիմ Քալլընը երեկ վերջապես խոստովանել է, որ Թուրքիան ոչ պակաս, նույնիսկ մի բան էլ ավելի, մասնակցություն է ունեցել արցախյան պատերազմին։ Քալլընը շնորհավորել է Թուրքիայի և Ադրբեջանի քաղաքացիներին Ղարաբաղում տարած հաղթանակի կապակցությամբ, այն մեծ ձեռքբերում անվանելով։ Ավելին, ըստ էրդողանի խորհրդականի, Ղարաբաղում հաղթանակը և Թուրքիայի մասնակցությունը այն հստակ օրինակներից է, որ գործնականում ապացուցվել է «մեկ ազգ, երկու պետություն» արտահայտությունը։

«Այնտեղ թուրքական բանակը, ադրբեջանական բանակը, մեր հետախուզությունը, արտգործնախարարները և, իհարկե, նախևառաջ նախագահները, հսկայական ժամանակ ու ջանք են ծախսել գիշեր – ցերեկ, երբեմն գիշերները հեռախոսազանգեր են կատարվել։ Րոպե առ րոպե հետևել ենք այդ հաղթանակին»,- ասել է Քալլընը և հավելել, ասել, որ հաղթանակը հեշտ չի տրվել, շատ զոհեր են եղել։

Փաստացի Թուքիան այլևս թաքցնելու ոչինչ չունի և միջազգային հանրությանը որևէ կերպ չի էլ փորձում սեթևեթել, ընդհակառակը հստակ ֆիքսում է տարածաշրջանում իր ներգրավվածությունը, նաև Հայաստանի, Ռուսաստանի և այլ երկրների համար ամրագրում, որ արցախյան պատերազմում Հայաստանի պարտության հիմնական կազմակերպիչն ու իրականացնողը ոչ թե Ադրբեջանն է, այլ Թուրքիան։ 
Սա նաև հստակ մեսիջ է Ադրբեջանին։ Իլհամ Ալիևը, որքան էլ նրան ընկալում են որպես Թուրքիայի փոքր եղբայր, երբեմն-երբեմն փորձում է ինքնուրույն քաղաքական խաղեր տալ, Թուրքիայի խոսնակի արձագանքը հստակ նախազգուշացում է Ադրբեջանին, բաց տեքստով բացատրում են, թե ով է եղել Ադրբեջանի հաղթանակի իրական  կերտողը։ 

Գագիկ Աբրահամյան