Հայաստանի նվաստացումների միակ աղբյուրը Փաշինյանն է

Արցախյան 44-օրյա պատերազմի տարելիցի միջոցառումները երեկ տեղի են ունեցել թե՛ Հայաստանում, թե՛ Ադրբեջանում և ինչպես վերջին մեկ տարվա ընթացքում, ցավով ստիպված ենք արձանագրել, այս առումով էլ Հայաստանը ետ մնաց մեր թշնամուց։ Առավոտյան միայն Նիկոլ Փաշինյանն ու պետական բարձրաստիճան պաշտոնյաները, ինչպես նաև Միացիալ Նահանգների դեսպանը այցելեցին Եռաբլուր։ Այնուհետև ժամը 11-ին 1 րոպե լռությամբ փորձեցին հարգել․ փորձեցին, որովհետև, իրականում լռության րոպեն միայն Արցախում էր, որ իրականացվեց ճշգրտորեն։ Հայաստանի Հանրապետությունում բացարձակ անտարբերությամբ վերաբերվեցին։ Նույն այդ ժամանակ Ադրբեջանի նախագահ Իլհամ Ալիևը՝ իր փոխնախագահ տիկնոջ Մեհրիբանի գլխավորությամբ, մեծ երթ էր արել, որին հազարավոր զինվորներ էին մասնակցում՝ պատերազմում զոհված ադրբեջանցի զինվորների և քաղաքացիական անձանց լուսանկարներով։ Ալիևը նաև միջոցառման ավարտին հաղթանակի թանգարանի հիմնարկեք իրականացրեց։ Սակայն ամենացավալին թուրքական «Անադոլու» գործակալությանը նրա տված հարցազրույցն էր. «Եթե Հայաստանն ասում է, որ սահմանն անցնում է այնտեղ, ինչո՞ւ որևէ մեկը այնտեղ չի եղել, եթե կա սահման, եկե՛ք և պահպանեք այն, մենք եկել և տեղավորվել ենք այդ լեռներում »,- ասել է Ալիևը։

Բացարձակապես անհնար է վիճել թշնամի պետության ղեկավարի հետ, հստակ և պարզ բացատրում է, որ Հայաստանի իշխանությունները անկարող են իրականացնել նույնիսկ Հայաստանի սահմանի պաշտպանությունը, ի վիճակի չեն որևէ քայլ կատարել։ Մեկ այլ դեպքում էլ Իլհամ Ալիևը հայտարարել է. «Եթե ինչ-որ մեկը ցանկանում է հարություն տալ Լեռնային Ղարաբաղի անվանմամբ հանգուցյալին, թող նրան հարություն տա իր տարածքում»:

Ադրբեջանցիներին հղած իր ուղերձում նա նշել է, թե Ադրբեջանը վերականգնել է իր տարածքային ամբողջականությունը և ցանկացած մեկը կարող է Լեռնային Ղարաբաղ անունով միավորում ստեղծել իր տարածքում. կրթություն, հանրապետություն, հասարակություն, խոստացել է նույնիսկ ճանաչել այն, բայց ոչ Ադրբեջանում։

«Այդ հարցը լուծված է, ես եմ ասում Ադրբեջանի նախագահը, զինված ուժերի գերագույն հրամանատարը, բոլորը պետք է հաշվի նստեն այս խոսքերի հետ»,- հայտարարել է Ալիևը։

Լկտիության այս գագաթնակետը, իհարկե, ցավալի է հայ հանրության համար, ցավալի է յուրաքանչյուրիս համար, սակայն ստիպված ենք արձանագրել, որ Ադրբեջանի նախագահը այս ամենը իրականացնում է բացառապես մեր՝ Հայաստանի Հանրապետության իշխանությունների թողտվության պայմաններում։ Եթե Հայաստանի պետական իշխանությունները՝ ի դեմս Նիկոլ Փաշինյանի, ի վիճակի չէ պաշտպանելու մեր սահմանները, իհարկե, յուրաքանչյուր թշնամի էլ կգա և կնստի այդ սահմանների վրա, մաքսեր կգանձի հայ և օտարերկրացի վարորդներից։ Եթե Հայաստանի Հանրապետությունը ի վիճակի չէ ապահովել Լեռնային Ղարաբաղի անվտանգությունը, նույնիսկ Հայաստանի Հանրապետության անվտանգությունը ի վիճակի չէ պաշտպանել, ապա Ադրբեջանը, Թուրքիան ցանկացած այլ պետություն իրեն կարող է թույլ տալ այդ լպիրշությունը, գրավել, նեղել, նվաստացնել Հայաստանին։ Եվ Հայաստանը շարունակելու է կրել այդ նվաստացումները բացառապես մեկ պատճառով, քանի որ իշխանության ղեկին Նիկոլ Փաշինյանն է։

Լևոն Գինոսյան