Իրանը Հայաստանի կարիքն ունի

Իրանի դեմ թուրք-ադրբեջանական դեմարշի, երկրների միջև հարաբերությունների կտրուկ սրման ֆոնին լուրջ աշխարհաքաղաքական զարգացումներ են ընթանում մեր տարածաշրջանում։ Հայտնի է, որ առաջիկայում Թեհրանում կայանալու է երեք երկրների արտգործնախարարների հանդիպումը, որի ընթացքում քննարկելու են բազմաթիվ խնդիրներ, այդ թվում անվտանգային խնդիրները։ Այս առումով հետաքրքիր է Իրանի նախագահ Էբրահիմ Ռայիսիի Հայաստանի անկախության տոնին նվիրված ուղերձը՝ ուղղված վարչապետ Նիկոլ Փաշինյանին և Արմեն Սարգսյանին։

Իրանի նախագահը հայտնել է իր վարչակազմի պատրաստակամությունը՝ ամրապնդելու Հայաստանի հետ հարաբերությունները տարբեր ոլորտներում, նշել, որ այդ համագործակցությունը համապատասխանում է երկու երկրների շահերին և կամրապնդի տարածքային անվտանգությունն ու կայունությունը։ Ռայիսին նաև նշել է, որ Իրանի և Հայաստանի նոր կառավարությունները նոր դարաշրջանում կարող են հասնել նշանակալից ձեռքբերումների, նպաստել տարածաշրջանի անվտանգությանն ու կայունությանը, բավարարել երկու բարեկամ ժողովրդների շահերը։ Ըստ էության, Իրանը հաստատում է, որ ցանկանում է առավել խորացնել հարաբերությունները Հայաստանի հետ, հատկապես Որոտանի հատվածում ադրբեջանցիների պահվածքի, իրանական բեռնատարները կանգնեցնելու, իրանցիներին հետապնդելու և վնասելու քայլերը լրջորեն մտահոգում են Իրանի իշխանություններին, որոնք միջազգային մեկուսացման պայմաններում լուրջ խնդիրների են բախվելու։ Իհարկե այնպես չէ, որ Ադրբեջանը ցանկանում է ամբողջությամբ ճնշել Իրանին, սակայն խնդիրն այստեղ դրված է տարանցիկ ճանապարհները Հայաստանի տարածքից վերացնելու և իրանական բեռնատարները դեպի Եվրոպա և այլ պետություններ Ադրբեջանի տարածքով ուղղելու համար։ Ադրբեջանը գործում է այստեղ բացառապես իր շահերի համատեքստում, ցանկանում է օգուտ ստանալ իրանական բեռնատարների տարանցումից։ Մինչդեռ իրանական իշխանությունները հրաշալի հասկանում են դրա ամբողջ վտանգը, որ կախվածության մեջ են հայտնվելու Ադրբեջանից և հետևաբար նաև Թուրքիայից։

Հայաստանի և Իրանի շահերը համընկնում են։ Զարհուրելին Հայաստանի գործող իշխանությունների պահվածքն է։ Մինչ օրս իշխանության որևէ ներկայացուցիչ հստակ ազդակներ չի ներկայացրել Իրանին, համագործակցությունը խորացնելու առումով։ Մինչդեռ դա պետք է լիներ Հայաստանի իշխանությունների առաջնային քայլերից մեկը։ Բացառապես միայն «Հայրենիք» կուսակցության նախագահ Արթուր Վանեցյանն է, որը շեշտել է համագործակցությունը զարգացնելու, անվտանգային խնդիրներին համատեղ լուծումներ տալու անհրաժեշտության մասին։ Ըստ էության, Հայաստանի շուրջ նոր զարգացումներ են ընթանում, որին անհաղորդ է Նիկոլ Փաշինյանի իշխանությունը։

Արսեն Աբրահամյան