Կարծիք. Իրանը հյուսիսային սահմաններում իր զորավարժություններով Բաքվին ուղարկել է «թալիշական ազդանշան»
ՀԱՍԱՐԱԿՈՒԹՅՈՒՆ
eadaily.com-ը գրում է, որ հաշվի առնելով այն, որ Ադրբեջանի ներսում թալիշների խնդիրը վերջերս սրվել է, և դա, մասնավորապես, հանգեցրել է նրան, որ անգամ չափավոր դիրքորոշում ունեցող թալիշական կազմակերպություններից մեկը լուրջ դժգոհություն է հայտնել, ապա Իրանի կողմից այս օրերին զորավարժությունների համար գոտի ընտրելը որոշակիորեն պատահական չէ, և որը հստակ պարունակում է միանգամից մի քանի ազդակ Բաքվի ուղղությամբ: Այդ մասին իր ֆեյսբուքյան էջում գրել է Հայաստանի առաջատար իրանագետներից մեկը հանդիսացող Վարդան Ոսկանյանը: «Ադրբեջանի սահմանին իրանական զորավարժությունների գոտին ինքնին շատ ուշագրավ է: Դատելով իրանական աղբյուրների տարածած նյութերից այն ընդգրկում է Ադրբեջանի թալիշաբնակ շրջանների հետ գրեթե ամբողջ սահմանը: Հստակ է, որ դա ազդանշան է Ադրբեջանին: Ի դեպ, վերջին ուրբաթօրյա աղոթքից հետո այդ ազդանշանը պերճախոս ներկայացրել է իրանցի հոգևորականներից մեկը ասելով. «Առյուծի պոչի հետ պետք չէ խաղալ»:
Հարկ է նշել, որ վերջին օրերին Թեհրանի և Բաքվի հարաբերությունները լարվածություն են ապրում նաև կապված Հայաստանի Սյունիքի մարզի Մ -2 միջպետական ավտոճանապարհին (Իրան - Հայաստան) ադրբեջանցի ոստիկանների գործողությունների հետ: Բանը հասել է նրան, որ հայկական Սյունիքի Գորիս-Կապան ճանապարհին, որի որոշ հատվածներ ղարաբաղյան պատերազմից հետո Բաքվի վերահսկողության տակ են անցել, «ճանապարհային տուրքի» չվճարման պատճառաբանությամբ ադրբեջանական կողմը ձերբակալել է երկու իրանցի ծանր բեռնատարների վարորդների: Միևնույն ժամանակ, Կասպից հանրապետության որոշ մեկնաբաններ տեղական փորձագետներին խորհուրդ են տվել Թեհրանին «չմոռանալ» Իրանի հյուսիսարևմտյան նահանգների միլիոնավոր էթնիկ ադրբեջանցիների մասին, որոնց Բաքվի «տաք գլուխները» անվանում են «Հարավային Ադրբեջան»: Նշենք, որ թալիշները Հարավային Կովկասի իրանական ծագման ժողովուրդ են, որոնք պատմականորեն բնակվում են Թալիշի լեռնային և նախալեռնային շրջաններում Կասպից ծովի հարավարևմտյան ափին հարակից տարածքում: Նրանց լեզուն՝ թալիշերենը պատկանում է իրանական լեզվախմբին:
Նյութը հրապարակման պատրաստեց Կամո Խաչիկյանը
