Իշխանության սադրանքը չհաջողվեց․ Ղազինյանին կառաջադրեն չորրորդ անգամ

«Ընդդիմադիր «Հայաստան» խմբակցությունը չորրորդ անգամ կառաջադրի Արթուր Ղազինյանի թեկնածությունն ԱԺ Պաշտպանության և անվտանգության հանձնաժողովի փոխնախագահի պաշտոնում։ Հանձնաժողովի իշխանական անդամները տարբեր պատճառաբանություններով արդեն երեք անգամ դեմ են քվեարկել Արթուր Ղազինյանի թեկնածությանը։ Վստահաբար, դեմ կքվեարկեն նաև չորրորդ, հետո հինգերորդ և անհամար անգամներ։ Գործող իշխանությունները նյարդերի այս պայքարում պարտվում են՝ հայտնվելով իրենց իսկ լարած քաղաքական թակարդում։ Ընդդիմադիր ուժը, կրկին աջակցելով Ղազինյանի թեկնածությանը, սկզբունքայնություն է դրսևորում, իշխանականներին ներքաշում նուրբ խաղի մեջ, որտեղ Նիկոլ Փաշինյանն ու իր կողմնակիցները թույլ են։ Ի սկզբանե խնդիր էր դրված ամեն գնով խափանել Արթուր Ղազինյանի թեկնածությունը, ընտրել ցանկացածին, բացի նրանից։ Այժմ արդեն իշխանությունն ապացուցում է իր քաղաքական, մարդկային վախերը հենց Ղազինյանից։ Իսկ այն, որ փաշինյանականները չեն թաքցնում իրենց վախերը, այլևս ակնհայտ է։

Ընդդիմադիր պատգամավորն էլ, ասես, դարձել է «Քաղաքացիական պայմանագրի» հիմնական քաղաքական ախոյաններից մեկը։ Ըստ էության, չգիտակցելով իրենց արածի ողջ անհեթեթությունը, իշխանականները ինքնաբերաբար բարձրացնում են Արթուր Ղազինյանի դերն ու կշիռը։ «Քաղաքացիական պայմանագիրը» հայտնվել է պաշտպանվողի դերում, իսկ նման գործելաոճը միայն պարտության կարող է տանել։ Ի դեպ, Արթուր Ղազինյանին չընտրելով, «Քաղաքացիական պայմանագիրը» մեկ այլ սխալ հաշվարկ էլ էր արել։ Փորձում են այսկերպ ցույց տալ, թե ընդդիմության պատճառով է ձախողվում հանձնաժողովի աշխատանքը, մասնավորապես 44-օրյա պատերազմի հանգամանքներն ուսումնասիրելու գործում։ Հանրության ուղեղը լվացել են, բայց ոչ այնքան, որ ընդդիմությունը չկարողանա բացատրել, թե ԱԺ Պաշտպանության և անվտանգության հարցերի հանձնաժողովը ցանկացած պահի կարող է անցնել իր բնականոն աշխատանքին, օրենքը որևէ սահմանափակում չի դրել այդ հարցում։

Կարեն Զաքարյան