Փաշինյանը ՀԱՊԿ-ում մոռացել է հայկական շահերը

Տաջիկստանի մայրաքաղաք Դուշանբեում այս օրերին ընթանում է ՀԱՊԿ ղեկավարների նիստը։ Վարչապետ Նիկոլ Փաշինյանը երեկ ստանձնել է ՀԱՊԿ նախագահությունը, բոցաշունչ մի ելույթ ունեցել, նախանշել կառույցի անելիքները, արդիականացման անհրաժեշտությունը։ Եվ ոչ մի բառ Արցախի, հայ ռազմագերիների, ընդամենը 10 ամիս առաջ տանուլ տված պատերազմի, Ադրբեջանին պատասխանատվության ենթարկելու մասին։

Այս օրերին հայ հանրությանն ամենահուզող թեման՝ Որոտանի ճանապարհին ադրբեջանցիների լպիրշ պահվածքն է։ Հայաստանի վարչապետի պաշտոնին հայտնված անձը նույնիսկ այդ մասին հարկ չի համարել դիրքորոշում արտահայտել Դուշանբեում։ Միգուցե՞ մոռացել է, կարող են հարցնել Փաշինյանի վաստակավոր զոմբիները։ Բնավ, ոչ․․․ Պարզապես Հայաստանի վարչապետը մի կողմ է դրել Հայաստանի շահերը, սպասարկում է այլ երկրների՝ Ռուսաստանի, Ադրբեջանի, ՀԱՊԿ-ի, ցանկացած ուրիշ մեկի շահերը՝ այդկերպ փորձելով պահպանել իր խախուտ իշխանությունը։ Հայաստանի ինքնիշխան շահը վաղուց այլևս տեղ չունի գործող իշխանության սրտի խորխորատներում։

Արտահերթ խորհրդարանական ընտրություններում «Քաղաքացիական պայմանագիրը» կարողացավ կրկին օգտագործել նախկինների դեմ տարիներով իրականացված հակաքարոզը, հատկապես գյուղական շրջանների բնակիչներին համոզել, թե Քոչարյանի կամ Սերժ Սարգսյանի վերադարձի դեպքում իրենց կյանքն ավելի լավը չի լինի, և 54 տոկոս քվե ապահովեց իր համար։ Այժմ Նիկոլ Փաշինյանի թիվ մեկ խնդիրն է՝ բոլոր հնարավոր և անհնարին միջոցներով պահպանել իր իշխանությունը։ Այդ նպատակի համար էլ նա պատրաստ է սպասարկել ցանկացածին։ Պատերազմի ողջ ընթացքում հանրությունն արդարացիորեն հարց էր բարձրացնում՝ որտեղ է ՀԱՊԿ-ն։ Այսօր այլևս այդ հարցը չի բարձրանա, անգամ այն պարագայում, երբ Հայաստանն է նախագահում այդ կառույցում։ Ավելի անատամ հայտարարությւոններ, ոչ մի խոսք Հայաստանի և Արցախի բնակիչների իրավունքների խախտումների, ՀՀ ինքնիշխան տարածքի դեմ ոտնձգությունների մասին։ Եվ մեղավորն ու պատասխանատուն լինելու է Նիկոլ Փաշինյանը՝ յուր բոլոր ընտրողների հետ։

Խաչատուր Տոնոյան