Որոտանի ճանապարհը՝ Հայաստանի կյանքի արահետ
ՎԵՐԼՈՒԾՈՒԹՅՈՒՆՆԵՐ
Ադրբեջանցի ոստիկաններն արդեն չորրորդ օրն է՝ շարունակում են կանգնեցնել Իրանից Հայաստան բեռներ փոխադրող մեքենաները, ստուգել փաստաթղթերն ու, ըստ իրանցի վարորդների, գումար են պահանջում։ Հայաստանի իշխանություններն էլ «բերանները ջուր առած» որևէ քայլ չեն ձեռնարկում ադրբեջանցիների լկտիությունը կանխելու ուղղությամբ։ Միակ պաշտոնյան, որը արձանագրում է առկա խնդիրները, մարդու իրավունքների պաշտպան Արման Թաթոյանն է։ Վերջինս այսօր աշխատանքային խումբ է ուղարկել Սյունիքի մարզ։ Խումբը կիրականացնի մի շարք փաստահավաք աշխատանքներ ադրբեջանական զինծառայողների կողմից մարդու իրավունքները խախտող արարքների առնչությամբ, այդ թվում՝ կապված Մ2 միջպետական ճանապարհի Գորիսի Որոտան բնակավայրի հատվածում ադրբեջանական իշխանությունների տեղադրած ոստիկանական հենակետի հետ։
Հայաստանով անցնող ճանապարհի համար ավելի շատ մտահոգ են Իրանի իշխանությունները, որոնք բարձր մակարդակի բանակցություններ են վարում Ադրբեջանի հետ։ Փորձագետներն էլ ահազանգում են՝ Գորիս-Կապան միջպետական Մ2 ճանապարհի ադրբեջանական վերահսկողության տակ անցած հատվածներում ստեղծված իրավիճակը լոգիստիկ լրջագույն խնդիրներ է առաջացնում Հայաստանի համար։ Այս փաստը, կարծես, դուրս է մնացել Նիկոլ Փաշինյանի իշխանության ուշադրությունից։ Տպավորություն է, թե ՀՀ իշխանությունները միայն որոշակի հարցերում արձագանքելու իրավասություններ ունեն, իսկ կարևորագույն խնդիրներին արձագանքելը նրանց արգելված է։ ԱԳ նախարար Արարատ Միրզոյանն, օրինակ, Սլովակիայի իր գործընկերոջ՝ Իվան Կորչոկի հետ հանդիպմանը հայտարարել է, թե Ադրբեջանն այժմ փորձում է տպավորություն ստեղծել, թե ղարաբաղյան հակամարտությունն ավարտված է, ինչը չի համապատասխանում իրականությանը։
«Հակամարտությունը դեռևս կարգավորված չէ, քանի որ հակամարտության անկյունաքարային հիմնահարցերը լուծված չեն։ Արցախի ժողովուրդն իրավունք ունի ապրելու անվտանգ և ազատ միջավայրում, և դրա միակ նախապայմանը Լեռնային Ղարաբաղի կարգավիճակի հստակեցումն է, քանի դեռ կարգավիճակի հարցը մնում է չլուծված, խնդիրը չի կարող համարվել կարգավորված», - ասել է Միրզոյանը։
Որոտանի ճանապարհի մասին տառ անգամ ՀՀ ԱԳ Նախարարի բերանից դուրս չի եկել։ Իսկ մինչ այդ Ադրբեջանը շարունակում է կտոր-կտոր պոկել ՀՀ ինքնիշխան տարածքը։
Արմեն Տիգրանյան
