Ընդդիմադիրների հետապնդումները շարունակվում են

Հայաստանի գործող իշխանությունները շարունակում են հետապնդել ընդդիմադիր ակտիվիստներին։ Հայաստանի գլխավոր դատախազությունն օրերս հայտարարել էր, թե խորհրդարանական արտահերթ ընտրություններով շուրջ 80 քրեական գործ կա, այս պահին մեղադրանք է առաջադրվել 87 քաղաքացու։ 24 քաղաքացիների վերաբերյալ 16 քրեական գործեր արդեն իսկ ուղարկվել են դատարաններ։ Հատկանշական է, որ 24 մեղադրյալներից 10-ը երրորդ նախագահ Սերժ Սարգսյանի սատարած «Պատիվ ունեմ», 9-ն էլ երկրորդ նախագահ Ռոբերտ Քոչարյանի առաջնորդած «Հայաստան» դաշինքների պատգամավորի թեկնածուները կամ աջակիցներն են։ Մեղադրյալներ կան նաև «Բարգավաճ Հայաստանից» և այլ ուժերից, և ոչ մեկը իշխող «Քաղաքացիական պայմանագիր» կուսակցությունից, թեև ընտրություններից առաջ և քվեարկության օրը բազմաթիվ ահազանգեր են եղել իշխանականների կողմից իրականացվող ապօրինությունների մասին։

Ակնհայտ է, որ ընտրությունների վերաբերյալ հարուցված քրեական գործերն օգտագործվում են բացառապես ընդդիմության ներկայացուցիչների հետապնդումների համար։ Նիկոլ Փաշինյանի իշխանությունը կատարելագործել է նախկինում առկա բոլոր արատավոր բարքերը, իսկ իրավական հնարավորությունները օգտագործում է բացառապես քաղաքական նպատակներով։ Ընդդիմադիր քաղաքական ուժերն անընդհատ ներկայացնում են ապօրինությունների փաստերը, աղաղակում իրավապահների անիրավությունների մասին, սակայն միջազգային իրավապաշտպան կառույցներն ու նրանց տեղական արբանյակները լուռ են։ Թերևս, նրանց էլ է ձեռք տալիս ստեղծված իրավիճակը։ Իսկ արդյունքում տուժում է պետությունը, ժողովրդավարությունն ու Հայաստանի զարգացման հեռանկարը։

Արսեն Սանոսյան