ԱԺ Պաշտպանության հանձնաժողովը չի կարողանում սկսել աշխատանքը

Ազգային ժողովի Պաշտպանության և անվտանգության հարցերի հաձնաժողովը համառորեն չի կարողանում սկսել իր աշխատանքը, և, ըստ ամենայնի, դեռ երկար չի կարողանա անցնել բնականոն աշխատանքի։ Հանձնաժողովը երեկ երրորդ անգամ չի ընտրել Արթուր Ղազինյանին հանձնաժողովի փոխնախագահի պաշտոնում։ Հիշեցնենք, որ իշխանական պատգամավորները Ղազինյանի թեկնածությանը դեմ էին քվեարկել նաև օգոստոսի 31-ին ու սեպտեմբերի 6-ին։ ԱԺ պաշտպանության և անվտանգության հարցերի մշտական հանձնաժողովի նախագահի տեղակալի պաշտոնը, ըստ Դոնթի բանաձևի, հատկացված է ընդդիմությանը։

Իշխանականները, ըստ էության, մտադիր են մինչև վերջ շարունակել իրենց պահվածքն ու չընտրել Ղազինյանին։ Հանձնաժողովի նախագահ Անդրանիկ Քոչարյանն ու մյուս անդամները չեն էլ թաքցնում, որ խնդիրը Արթուր Ղազինյանի ընդդիմադիր կեցվածքն է, սոցցանցերում և հանրային այլ հարթակներում Նիկոլ Փաշինյանի հասցեին քննադատությունները։ Փաշինյանին բազմիցս և խստորեն քննադատել են նաև հանձնաժողովի մյուս ընդդիմադիր անդամները ևս՝ Գեղամ Մանուկյանը, Գեղամ Նազարյանը, «Պատիվ ունեմ» դաշինքից Տիգրան Աբրահամյանը։ Եվ չկա որևէ երաշխիք, որ Ղազինյանի փոխարեն նրանցից որևէ մեկի թեկնածությունը ներկայացնելիս՝ իշխանության պահվածքը կարող է փոխվել։ Ընդդիմությունն էլ, աչքի ընկնելով սկզբունքայնությամբ, նյարդերի այս պայքարում չի զիջում իշխանությանը, կրկին առաջադրում է Ղազինյանի թեկնածությունը։ Արդյունքում տուժում է 44-օրյա պատերազմի հանգամանքների քննությունը, որ ի պաշտոնե պիտի իրականացնի հենց այս հանձնաժողովը։ Միգուցե, հենց դա էլ Փաշինյանի կողմնակիցների բուն նպատակն է։

Դավիթ Մաթևոսյան