Իշխանության ճշմարտախոսը․ Հովիկ Աղազարյանը ակամա բացահայտում է իշխանության ծրագիրը

Ազգային ժողովի «Քաղաքացիական պայմանագիր» խմբակցության պատգամավոր Հովիկ Աղազարյանը, թերևս, այդ իշխանության միակ ճշմարտախոս պատգամավորն է։ Կամա թե ակամա նա մշտապես բացահայտել է Նիկոլ Փաշինյանի և նրա կողմնակիցների իրական ծրագրերը։ Երեկ էլ Աղազարյանը ԶԼՄ-ների հետ խոսել է սեպտեմբերի 21-ին նախանշված տոնակատարություններից, անդրադարձել կառավարության նիստին Նիկոլ Փաշինյանի այն հայտարարությանը, որ Հայաստանի Հանրապետության 30-ամյակը պետք է նշել հավուր պատշաճի և գունագեղ տոնակատարություն կազմակերպվի:

«Գրեթե մեկ տարի է ես խուսափում եմ զվարճանքի էլեմենտ պարունակող միջոցառումներից, ուղղակի տրամադրություն չկա, մյուս կողմից էլ, մեր տղաները զոհվել են, որ ժողովուրդը ապրի, և չպետք է կաղապարվենք։ 30-ամյակը բավականին լուրջ տարեդարձ է, պետք է այնպես կազմակերպենք, որ չվիրավորենք մեր հայրենակիցներին»,- ասել է Աղազարյանն ու հավելել․ «Մենք չպետք է սգանք մեր զինվորների մահը, մենք պետք է ափսոսանք նրանց, եթե այդ մակարդակին հասած լինեինք, այլ իրավիճակ կլիներ: Նույնիսկ կգտնվեն զոհվածների հարազատների մեջ մարդիկ, որ կհաստատեն, որ իրենց որդին զոհվել է, որ հայ ժողովուրդն իրեն լավ զգա բոլոր առումներով»:

Ըստ էության, Աղազարյանը հաստատում է, թե Փաշինյանի իշխանության միակ նպատակը ժողովրդի տրամադրությունը բարձրացնելն է, այլ խնդիրներից շեղելը, ինչը, փաստենք, բնակչության որոշ մասի դեպքում ստացվում է։ Նիկոլ Փաշինյանի իշխանությունն ամեն ինչ անում է, որ կորուստները չսգան, այլ ափսոսանք հայտնեն։ Պատերազմից հետո հոգեբանական ծանր վիճակում գտնվող ժողովուրդը ինչ-որ պահի հարցեր պիտի տա գործող իշխանություններին։ Իշխանությունն էլ հասկանում է այդ վտանգը, պատկերացնում, թե ինչ հետևանքներ կարող է ունենալ այդ արթնացումը, և փորձելու է «հաց և տեսարաններ» սկզբունքով խեղդել պարտության և կորստի ցավը։ «Հացը», իհարկե, քչություն է անելու, ուստի ուժը տալու են «տեսարաններին»։ Իսկ դրա համար ահռելի՝ գրեթե 1,2 միլիարդ դրամ են հատկացրել։

Արամ Քարամյան