Իշխանության բարոյազրկումը շարունակվում է

Ամեն անգամ, երբ մտածում ես, թե Նիկոլ Փաշինյանի իշխանությունը հասել է հատակին և այլևս նոր անբարոյականություն չեն կարող մոգոնել, հերթական «անակնկալը» ապշեցնում է իր ծայրահեղ ցինիզմով։ Հայաստանի Ազգային ժողովի նախագահը, ԱԺ մշտական հանձնաժողովի նախագահն ու մի՝ վարչապետին բարեկամ պատգամավոր օրերս մեկնել էին Հունաստանի Միկոնոս կղզի։ Եռօրա այդ հանգստի ընթացքում Ալեն Սիմոնյանը, Էդուարդ Աղաջանյանն ու Հրաչյա Հակոբյանը հասցրեցին դառնալ սոցիալական ցանցերի «աստղերը», իսկ նրանց մասնակցությամբ տեսանյութը տարածվեց բազմաթիվ լրատվամիջոցներով։

Պատերազմից հետո ծայրահեղ ծանր հոգեբանական, տնտեսական ու քաղաքական վիճակում հայտնված երկրի իշխանավորները չեն խորշում անդրծովյան կայֆերից։ Սոցցանցերում նշվում է, թե իշխանական եռյակը իր երեկոներից մեկն անցկացրել է Միկոնոսի ամենաթանկ The Void club ակումբում, որի մուտքը միայն արժի 3-6 հազար եվրո։ Մեկ այլ օգտատեր էլ նշել, թե Ալեն Սիմոնյանը ու կինը հանգստացել են Myconian Utopia Resort Mykonos հյուրանոցում, որտեղ մեկ գիշեր մնալու արժեքը, ըստ Booking․com-ի, հասնում է 1.799.650 դրամի: Իշխանության ներկայացուցիչների այս լպիրշությունը, ի դեպ, բոլորովին չի մտահոգում իրենց ընտրազանգվածին, որի որոշ առանձնյակներ ոչ պակաս ցինիզմով պաշտպանում են «ընտրյալների» վարքը։ 2018թ․ իշխանության գալով վեհ ու ճոռոմ կարգախոսներով բարոյախրատական ճառերով, նախկինների ցոփ ու շվայտ կենսակերպը քննադատելով՝ Նիկոլ Փաշինյանի իշխանությունը վաղուց գերազանցել է իր նախորդներին, իսկ նրա կողմնակիցների համեմատ շմայսները պարզապես փոքրիկ և անփորձ երեխաներ են։

Արման Մանուկյան