Թուրք-ադրբեջանական զորավարժությունները վտանգ են ներկայացնում Հայաստանին

Արցախյան պատերազմից անցել է շուրջ 10 ամիս, բայց Թուրքիան և Ադրբեջանը շարունակում են ամրապնդել իրենց ռազմական պոտենցյալը։ Անհնար է հաշվել, թե որքան զորավարժություններ են արել այս ընթացքում թշնամի պետությունները հենց մեր քթի տակ։ Այս պահին էլ Թուրքիան և Ադրբեջանը երեք զորավարժություններ են անցկացնում՝ «ԹուրԱզ Շահինի -2021» թուրքական Քոնյա քաղաքում թուրք-ադրբեջանական, «Երեք եղբայր- 2021» թուրք-պակիստան-ադրբեջանական՝ Ադրբեջանում և թուրք-ադրբեջանական՝ Բերձորի շրջանում։ Բաքվում ընթացող զորավարժությունների նպատակն է՝ բարելավել մարտական գործողությունների ընթացքում երկու երկրների բանակային ստորաբաժանումների փոխգործունակությունը, զարգացնել հրամանատարների միջև ռազմական որոշումներ կայացնելու հմտությունները և նրանց կարողությունը՝ վերահսկել ստորաբաժանումները։ Թուրքիայի Ազգային պաշտպանության նախարարությունը հայտնել է, որ զորավարժությունների ժամանակ բնակավայրերում հետևակի ու հրազենի կիրառմամբ ռազմական գործողությունների ուսուցում է անցկացվելու։

 

Արցախի օկուպացված Բերձորում (Լաչին) էլ հատուկ ուշադրություն է դարձվում ժամանակակից ռազմական տեխնիկայի կիրառման հմտությունների կատարելագործմանը բարդ տեղանքի պայմաններում: Թերևս, պարզ է, թե ինչ նպատակներով են իրականացվում այս զորավարժությունները։ Ռազմական փորձագետ, ԱԺ պատգամավոր Տիգրան Աբրահամյանն արձանագրում է, որ Քաշաթաղի շրջանում թուրք-ադրբեջանական զորավարժությունների անցկացումը սադրանք է և այս թեմայով Հայաստանի իշխանությունը պետք է հանդես գա համապատասխան արձագանքով։ «Արցախից բռնազավթված տարածքներում զորքերի ցանկացած կուտակում, տեղաշարժեր արդեն իսկ վտանգավոր բնույթ է կրում, եթե հաշվի առնենք, որ դրանք տեղի են ունենում Գորիս-Կապան ճանապարհի կամ Սև լճի հարակից հատվածներում, ապա խնդիրն առավել սուր ընթացք է ստանում։ Այս ամենին գումարվում է թուրքական զինուժի մասնակցությունն ու վերջին շրջանի սահմանային միջադեպերը, ինչն ամբողջացնում է ողջ պատկերը,»- նշել է Աբրահամյանը։