Իշխանությունը չի շտապում թեկնածուներ առաջադրել ՏԻՄ ընտրություններում

Առաջիկայում երեք փուլով ՏԻՄ ընտրություններն են կայանալու։ Առաջին ընտրությունները լինելու են հոկտեմբերի 17-ին, համամասնական ընտրակարգով քաղաքապետ և ավագանի կընտրեն Գյումրիում, Դիլիջանում, Մեղրիում, Գորիսում և այլ համայնքներում։ Թեպետ, ընտրացուցակները ներկայացնելու վերջնաժամկետը սեպտեմբերի 12-ն է, ո՛չ իշխանությունները, ո՛չ ընդդիմությունը չեն շտապում ներկայացնել իրենց ցուցակները։ Եթե ընդդիմադիր ուժերի դեպքում պարզ է՝ փորձում են ինտրիգը պահել մինչև վերջին օրը, ապա իշխանության ներսում լուրջ խմորումներ են ընթանում, տեղերում ազդեցություն ունեցող մարզպետները, պատգամավորները փորձում են իրենց յուրայիններին խցկել ընտրական ցուցակներ կամ քաղաքապետի թեկնածու առաջադրել։ Գյումրիում, օրինակ, իրենց մտերիմներին քաղաքապետ անցկացնելու վրա են աշխատում պատգամավորներ Կարեն Սարուխանյանը, Նազելի Բաղդասարյանը, մարզպետ Հովհաննես Հարությունյանը, որոնցից յուրաքանչյուրը փորձում է Նիկոլ Փաշինյանին համոզել, թե հենց իրենց թեկնածուն է ամենալավն ու անցողիկը։

Նույն իրավիճակն է նաև Գորիսում։ Մեղրիում, կարծես, իշխանությունը հստակեցրել է իր անելիքները, թեկնածուն կլինի համայնքապետի պաշտոնակատար Արարատ Թումանյանը, որի հնարավորությունները հարավային քաղաքում առանձնապես լուրջ չեն համարվում։ Նրան հնարավոր է քաղաքապետ ընտրել՝ բացառապես վարչական ռեսուրսները օգտագործելով։ Գորիսում քաղաքապետի թեկնածուի հարցում լուրջ խմորումներ կան։ Պատգամավոր Արմեն Խաչատրյանն է հանձն առել կազմակերպել ընտրությունները։ Ու թեև «Քաղաքացիական պայմանագրի» տեղական ակտիվը այլ թեկնածու ունի, ում ավելի հաջող և անցողիկ են համարում, Արմեն Խաչատրյանն ամեն ինչ անում է իր թեկնածուին առաջ մղելու համար։

Այս փաստը վշտացրել է մարզպետ Մելիքսեթ Պողոսյանին, ով ևս թեկնածու ուներ Գորիսի քաղաքապետի պաշտոնի համար։ Այս հանգամանքը ընդդիմությանն ավելի մեծ շանսեր է տալիս՝ կարևոր այդ քաղաքում պարտության մատնել իշխանության թեկնածուին։ Առուշ Առուշանյանը չի մասնակցի ընտրություններին, բայց ցուցակը կգլխավորի փոքաղաքապետ Մենուա Հովսեփյանը, ով օրեր առաջ էր կալանավորվել։ Մեր տեղեկություններով, Նիկոլ Փաշինյանը հանձնարարել է մեկ անգամ էլ ուսումնասիրել իրավիճակը Գորիսում և հնարավորինս լուրջ թեկնածու առաջադրել։

Տիրան Ներսիսյան