«Հանգիստ սնանկանալ»․ ի՞նչ է առաջարկում նախարարը տունը կորցրած քաշաթաղցուն
ՎԵՐԼՈՒԾՈՒԹՅՈՒՆՆԵՐ
Հայաստանի էկոնոմիկայի նախարար Վահան Քերոբյանը գործադիրում կատարում է նույն դերը, ինչ Հովիկ Աղազարյանը՝ Ազգային ժողովում։ Այսինքն, երբեմն ասում է բաներ, որոնք լրջորեն կասկածի տակ են դնում փաշինյանական իշխանությունների ողջամտությունը։ Երեկ կառավարութան նիստից հետո Քերոբյանը կառավարության շենքի դիմաց հանդիպել էր բողոքի ակցիայի մասնակիցներին։ Քաշաթաղում պատերազմի հետևանքով իրենց տները կորցրած մարդիկ իշխանություններից փոխհատուցում են պահանջում։ Քաշաթաղցիներից մեկը Քերոբյանին հայտնեց, որ ամեն շաբաթ VTB բանկից հաղորդագրություն է գալիս, որ վարկերը մուծի։
«Ես այդ վարկը վերցրել եմ, Կովսականում տուն եմ սարքել. ամսի 6-ին ինձ դատ են նշանակել, հիմա ես գնամ դատարանում ի՞նչ պետք է ասեմ»:
Քերոբյանի պատասխանն արտացոլում է այս իշխանության բարոյազրկումը, տնավեր մարդկանց նկատմամբ վերաբերմունքը։
«Հանգիստ կարելի է սնանկանալ, պարտքերը ջրվում է»,- ասել է նախարարը: «Ես հասկանում եմ, որ ինձ չեն կախելու, ասելու են, դե դու քյասիբ ես, քո վարկը ջրեցինք, բայց դա ինձ պետք չի, ես արժանապատիվ, աշխատող մարդ եմ: Ես պատերազմից հետո էլ իմ վարկը մուծել եմ, որովհետև աշխատավարձ եմ ստացել»,- մինչ տնավեր քաշաթաղցին փորձում էր նախարարին բացատրել, որ այդկերպ իր վարկային պատմությունը կսևանա, իսկ ինքը չի կարողանա նոր վարկեր վերցնել, նոր գործ սկսել Հայաստանում, Վահան Քերոբյանը պարզապես քմծիծաղ էր տալիս։
Իշխանության ներկայացուցչի այս պահվածքը ոչ մի տրամաբանության մեջ չի տեղավորվում։ Փոխանակ երկնքից իջնելու, մարդկանց ցավին դարման լինելու, Նիկոլ Փաշինյանի պաշտոնյաները ծաղրում են պատերազմից տուժածներին, իսկ հազարավոր արցախցիներ ստիպված են կա՛մ բողոքի ակցիա անել կառավարության շենքի դիմաց, կա՛մ էլ միջոցներ հայթայթել գոյատևելու համար։
Կարեն Այվազյան
