Տնտեսական 5.2 տոկոս աճն իներցիոն աճ է
ՏՆՏԵՍՈՒԹՅՈՒՆ
Փոխվարչապետ Սուրեն Պապիկյանը կառավարության նիստի մեկնարկին հայտարարել էր, որ օգոստոսի 31-ին «Մուդիս» հեղինակավոր վարկանշավորման կազմակերպությունը հրապարակել է հերթական զեկույցը, որով ՀՀ-ին տրված վարկանիշը մնացել է նույնը՝ ընթացիկ վարկանիշը սահմանելով BA3, իսկ հեռանկարը՝ կայուն։ Ֆինանսների նախարար Տիգրան Խաչատրյանն էլ նիստի ժամանակ նկատեց, որ «Մուդիսի» այս գնահատմամբ արձանագրվում է պատերազմի ու կորոնավիրուսի հետևանքով ի հայտ եկած ռիսկերի նկատմամբ ՀՀ տնտեսության դիմակայունության բարձրացումը և ընդգծում է, որ ՀՀ կառավարության տնտեսական քաղաքականությունն այդ տեսանկյունից արդյունավետ է:
«Նշվածը շատ կարևոր ազդակ է միջազգային ներդրողների համար, քանի որ վերահաստատում է Հայաստանի տնտեսական աճի կայուն հեռանկարը և կառավարության տնտեսական քաղաքականության բարենպաստությունը ներդրումների համար: Այն ընդգծում է նաև Հայաստանի բարձր տնտեսական աճի սպասումների ու կառավարության հարկաբյուջետային կարողությունների վերականգնման վերաբերյալ «Մուդիս»-ի կանխատեսումները»,- հավելեց նախարարը:
Այս թեմայով զրուցել ենք տնտեսագետ Սուրեն Պարսյանի հետ։ Հարցին, թե արդյո՞ք իրականում տնտեսական գործընթացը նման վարկանիշով է առաջ գնում տնտեսագետը պատասխանեց, որ ոչ․ «Այս տարվա 7 ամիսների ընթացքում այս կառավարությունը 1 միլիարդ դոլարով ավելացրել է մեր պետական պարտքը, այն դեպքում, երբ այդ ժամանակահատվածում ապահովել է ընդամենը 5.2 տոկոս տնտեսական ակտիվություն: Նման տեմպերով պետական պարտքի ավելացումը, բնականաբար, Հայաստանին տանելու է լուրջ ֆինանսական խնդիրների: Մենք պետք է հասկանանք, որ մեր տնտեսությունը, մեր տնտեսական գործընթացները նման վարկանիշներով չեն կարգավորվում. ներդրողը, տեղական կազմակերպությունները շատ հաճախ ուշադրություն չեն դարձնում այդ ամենի վրա, փոխարենը՝ տեսնում են, որ պետական պարտքն ավելանում է, ու նրանց վրա ապագայում դրվելու են լրացուցիչ հարկեր, որպեսզի կարողանան այդ վարկերը սպասարկել։ 5.2 տոկոս աճն իներցիոն աճ է, որի մեծ մասը բաժին է ընկնում հանքարդյունաբերության և շինարարության ոլորտներին։ Հանքարդյունաբերությունն անկախ այս կառավարության կամքից է աճում, քանի որ միջազգային շուկայում գներն աճել են, իսկ շինարարության ոլորտում՝ նրանք նույնիսկ չեն կարողացել մինչ ճգնաժամային ծավալն ապահովել: Նկատեմ, որ նույն վիճակն է նաև առևտրի և ծառայությունների դեպքում: Ստացվում է՝ մենք չենք վերականգնվել անցյալ տարվա ճգնաժամից. համեմատության համար նշեմ, որ հարևան Վրաստանում կիսամյակի կտրվածքով ունեն 12.3 տոկոս աճ, այսինքն՝ կրկնակի ավել, քան Հայաստանում, իսկ AMF-ի կողմից գնահատվող զարգացող երկրների համար միջին ցուցանիշը 6-ն է՝ այսինքն՝ մեր ցուցանիշն այդ միջին ցուցանիշից էլ ցածր է»։
Սոնա Գիշյան
