Գերիների վերադարձի գործընթացը սառեցված է
ՔԱՂԱՔԱԿԱՆՈՒԹՅՈՒՆ
Վերջերս Ադրբեջանում երկար տարիների ազատազրկման դատապարտվեցին հայ գերիներ։ Սրան զուգահեռ տեսնում ենք, որ գերիների վերադարձի գործընթացը որևէ կերպ առաջ չի գնում։
Այս թեմայով զրուցել ենք ՄԻԵԴ-ում գերիների հարցով փաստաբան Սիրանուշ Սահակյանի հետ։
Հարցին, թե արդյոք այս պահին սառեցված է գերիների գործընթացը, ի՞նչ տեղեկություններ կան` այն մասին փաստաբանը պատասխանել է․ «Այո, գերիների վերադարձի գործընթացը սառեցված է, և դա պայմանավորված է այլ գործոնով։ Քանի որ սահմանային միջադեպերն ինտենսիվացել են, հռետորաբանությունը փոփոխված է, կարծես քաղաքական պահանջների բավարարումն ավելի օրհասական խնդիր է դարձել։ Սրանով պայմանավորված՝ որևէ դրական գործողություններ Ադրբեջանի իշխանությունները թույլ չեն տալիս Հայաստանի նկատմամբ։ Ավելին, արհեստականորեն սպառնալիքներ են ստեղծում, և այս դատավարությունների արագացումը և դրանց արդյունքում կայացված երկարատև ազատազրկումներն էլ հենց դրան են միտված։ Այսինքն՝ 4, 6, 15 կամ 20 տարի ազատազրկման դատապարտելով՝ ի ցույց են դնում, որ հնարավորություն ունեն մեր ռազմագերիներին պահել տևական ժամանակ։ Եվ եթե Հայաստանի իշխանությունները չեն ուզում համակերպվել այդ իրականության հետ, ապա պարտավոր են գնալ որոշակի զիջումների։ Ավելի շատ խնդիրն օգտագործում են քաղաքական նպատակներով։ Իրավական տեսանկյունից մեր ռազմագերիները պաշտպանված են։ Մարդու իրավունքների եվրոպական դատարանում գործընթացներն անհամեմատ ավելի արագ են ընթանալու, քան նշանակված պատիժներն են։ Եվ այս պահին թե կառավարությունը, թե մենք վերանայել ենք գանգատի առարկան։ Ինքնուրույն գանգատներ են ներկայացվել ապօրինի դատապարտումների առնչությամբ, այս բոլոր գործերին տրված են առաջնահերթություններ։ Մենք ուղղակի պետք է փորձենք ժամանակի մեջ շատ արագ իրավական ճանապարհով հիմնավորել դատապարտումների ապօրինությունը և հասնել իրավավաբանորեն պարտադիր որոշման, որտեղ կարձանագրվի, որ անհապաղ պետք է ազատ արձակվեն»։
Սոնա Գիշյան
