Ճանապարհը բացվեց, բայց ինչի՞ դիմաց
ՎԵՐԼՈՒԾՈՒԹՅՈՒՆՆԵՐ
Հայաստանի Ազգային անվտանգության նախարարությունը երեկ երեկոյան հայտնեց, որ Գորիս-Կապան միջպետական ճանապարհի՝ օգոստոսի 25-ից փակված Գորիս-Որոտան և Շուռնուխ-Կարմրաքար հատվածները վերաբացվել են։
«Գորիս-Կապան միջպետական ճանապարհը բաց է բոլոր տեսակի տրանսպորտային միջոցների երթևեկության և քաղաքացիների ազատ տեղաշարժի համար», - ասված է գերատեսչության հաղորդագրության մեջ։
Շուռնուխից դեպի Կապան հատվածն ադրբեջանցիները չորեքշաբթի գիշերվանից էին փակ պահում, դրա հետևանքով հայկական մեքենաները շրջափակման մեջ էին հայտնվել, սակայն ավելի ուշ ռուսների միջնորդությամբ դրանք դուրս էին բերվել։ Երեկ առավոտից էլ ադրբեջանցիները փակել էին Գորիսից դեպի Քարահունջ ու Որոտան հատվածը։ Ստեղծված իրավիճակին անդրադարձել էր Մարդու իրավունքների պաշտպան Արման Թաթոյանը՝ նշելով, որ Սյունիքում Գորիս-Կապան ճանապարհը փակելը ադրբեջանական իշխանությունների կողմից նախապես պլանավորված բացահայտ հանցանք է ՀՀ ողջ քաղաքացիական բնակչության դեմ: Այդ հանցանքը նրանց զինված ծառայողները պարզապես իրագործել են իրենց իսկ հորինած սադրանքի հիման վրա:
Ադրբեջանական զինված ուժերի այս արարքները ՀՀ-ում առաջացրել են մարդու իրավունքների զանգվածային խախտումներ՝ մարդկանց ազատ տեղաշարժը, բժշկական ծառայությունների հասանելիությունը, խաթարվել է քաղաքացիական բնակչության բնականոն կյանքը և միջազգայնորեն երաշխավորված այլ կենսական իրավունքներ: Դրանից բացի, լրջորեն սահմանափակվել է տարբեր ապրանքներ, այդ թվում՝ գործարար նպատակներով տեղափոխող բեռնատար մեքենաների, մարդկանց տեղաշարժը Իրանից Հայաստան և հակառակը: Այսինքն՝ կաթվածահար է եղել Հայաստան-Իրան ճանապարհով ազատ տեղաշարժը»,- նշել էր Թաթոյանը: Վարչապետ Նիկոլ Փաշինյանը կառավարության նիստում շրջանցիկ ճանապարհ էր առաջարկել, որը, սակայն գրունտային է, և բնավ հարմար չէ մեծ բեռնատարների համար։
Երկու օր տևած բանակցություններից հետո ճանապարհը բացել են, սակայն իշխանություններն այդպես էլ չեն նշում, թե ինչ է քննարկվել բանակցություններում, որքան ժամանակ ճանապարհը բաց կլինի, արդյոք սահմանին անմիջապես կպած այդ ճանապարհը չի հանձվելու Ադրբեջանին՝ շրջանցող ճանապարհի շինարարությունից հետո։ Իսկ որ Կապան-Աղվանի-Տաթև ճանապարհին այսօր շինարարական մեծ աշխատանքներ են ընթանում, պարզվեց սոցիալական ցանցերում տարածված տեղեկություններից։ Ամեն դեպքում, իշխանությունները պարտավոր են հանգամանալից ներկայացնել, թե ինչ է բանակցվել Ադրբեջանի հետ, որպեսզի Սյունիքի բնակիչներն էլ իմանան իրենց գլխի գալիքը։
Արամ Գալյան
