Իլհամ Ալիևը ծաղրում է Նիկոլ Փաշինյանին

Հայաստանի իշխանություններն իրենց ստացած «պողպատե» մանդատի մասին հիշում են բացառապես ներքաղաքական զարգացումների համատեքստում, իսկ արտաքին աշխարհի, ու հատկապես թշնամու հետ հարաբերվելիս դառնում են իսկական «կուռկուռի ձագ»։ Ադրբեջանի նախագահ Իլհամ Ալիևն արդեն շուրջ 10 ամիս ծաղրում է Նիկոլ Փաշինյանին ու Հայաստանի իշխանություններին, մինչդեռ 2018թ․ իշխանափոխությունից առաջ մտքով չէր էլ անցկացնի նման վարք դրսևորել։ Վերջին պատերազմի մասնակիցների ընտանիքներին բնակարաններով ու ավտոմեքենաներով ապահովելու արարողությանը Իլհամ Ալիևը հայտարարել է, որ եթե Հայաստանը չհանձնվեր, իրենք մեծ կորուստներ կունենային:

 

«Նոյեմբերի 10-ի գիշերը Հայաստանը ստորագրեց կապիտուլյացիայի ակտը, և պատերազմն ավարտվեց: Մեզ համար պատերազմի ավարտը բացարձակապես ողջամիտ էր: Եթե պատերազմը շարունակվեր, մենք ավելի շատ կորուստներ կունենայինք: Մենք կարող էինք դժվարությունների հանդիպել Քելբաջարի և Լաչինի ազատագրման հարցում: Այս տարածաշրջանի բնական կլիման, լեռները կարող էին խնդիր դառնալ մեզ համար: Նաև ձմեռ էր մոտենում»,- ասել է Ադրբեջանի նախագահը: Նա նաև նշել է, թե այսօր Հայաստանն արդեն բացահայտորեն ընդունում է, որ չի կարող ապահովել իր անվտանգությունը, պաշտպանել իր սահմանները և ապրել իր հաշվին: «Հայաստանն անկախ երկիր անվանելը լիովին չարդարացված է: Որովհետև անկախ պետությանը բնորոշ հատկանիշների բացարձակ մեծամասնությունը բացակայում է հայկական պետությունում»,- ծաղրել է Ալիևը:

 

Ցավալին այն է, որ Ալիևի հայտարարություններին Փաշինյանը հակադարձելու ոչինչ չունի, ավելին, դարձել է նույն այդ բռնապետի խամաճիկը՝ դրանից բխող բոլոր հետևանքներով։ Թշնամու որևէ հոխորտանք չի արժանանում գործող իշխանության և նրա սպասարկուների արձագանքին, որոնք առիթը բաց չեն թողնում իրենց տղամարդ երևակայել ընդդիմախոսների վրա հարձակումների ժամանակ։ «Դուխով» ճչացողները զրկվել են դուխից, ընդամենը երեք տարում վերածվել անողնաշար և թուլամորթ զանգվածի, որն իր հետ անդունդն է քաշում երեք տասնամյակ փայփայած պետականությունը։