Ի՞նչ է կատարվում Սյունիքում․ իշխանությունը վախենում է պատասխանել ադրբեջանական սադրանքին

Մինչ Հայաստանի Ազգային ժողովում իշխանական պատգամավորները հախուռն հարձակումներ են գործում իրենց ընդդիմախոսների վրա, Հայաստանի պետական սահմանները կրկին մնացել են անտեր-անտիրական։ ԱԱԾ հաղորդագրության համաձայն, օգոստոսի 25-ին ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Նշված հատվածում գտնվող տրանսպորտային միջոցները տարհանվել են: Մարդու իրավունքների պաշտպան Արման Թաթոյանն էլ հայտնել էր, որ ադրբեջանցիների կողմից Կապան-Գորիս միջպետական ճանապարհի՝ Դավիթ Բեկ գյուղի հատվածի, փակման միջադեպով հատուկ հաղորդումներ կուղարկի համապատասխան միջազգային մարմիններին:

Թաթոյանը գիշերը ֆեյսբուքյան իր էջում գրել էր, որ ադրբեջանական 50 կամ ավելի զինված ծառայողներ փակել ու հրաժարվում են բացել ճանապարհը։ Պաշտպանն այս արարքները հանցավոր է որակում՝ նշելով՝ սահմանափակվել է մարդկանց, ողջ քաղաքացիական բնակչության, այդ թվում՝ երեխաների, կանանց, տարեցների, ազատ տեղաշարժը: Հայաստանի պետական մարմինները միջադեպին արձագանքել են միայն առավոտյան, կցկտուր տեղեկություններո հաղորդելով։ Վարչապետ Նիկոլ Փաշինյանն էլ խորհրդարանում պատասխանելով ընդդիմադիրների հարցադրումներին՝ հայտարարել է, թե Գորիս-Որոտան-Շուռնուխ՝ 21 կմ հատվածի շուրջ Հայաստանը չունի եռակողմ փաստաթուղթ։

«Այսօր արդեն Ռուսաստանի սահմանապահ զորքերը և այլ ուժեր լիարժեք ներկայացված են Սյունիքում, խոսքը Գորիս-Որոտան-Շուռնուխ հատվածի մասին է, և սա անվտանգային առումով բոլորովին նոր իրավիճակ է։ Իհարկե այս ամենի արդյուքնում կարող են ծագել տրանսպորտային լոգիստիկ բարդություններ, մեր որոշ ճանապարհների անխափան գործունեությունը կարող է դժվարանալ, բայց դրանք լուծելի են և դրանց ուղղությամբ ջանքեր ենք գործադրում, այդ թվում եռակողմ փաստաթուղթ ունենալու միջոցով»,- ասել է նա։

Ըստ էության, Փաշինյանը սահմանային միջադեպի պատասխանատվությունը, ՀՀ ինքնիշխան սահմանների պաշտպանության հարցը կրկին բարդում է ռուս սահմանապահների վրա։ Հարց է ծագում՝ իսկ ինչի՞ համար են հայ զինվորականները, միայն ԱԺ-ում խրամատներ փորելո՞ւ։

Կորյուն Լևոնյան