Իշխանությունը փորձում է պառակտում գցել ընդդիմության մեջ

Հայաստանի գործող իշխանությունները՝ Նիկոլ Փաշինյանի գլխավորությամբ, փորձում են պառակտում մտցնել ընդդիմադիր խմբակցությունների շրջանում։ Հանուն արդարության, նշենք, որ պառակտում մտցնելու հարցում Փաշինյանի իշխանությունը բավական հաջողված է, միայն այս մի բանն է կարողանում իրապես լավ իրականացնել, թեև վստահ ենք, որ խորհրդարանական ընդդիմությանը պառակտելու հարցում այս անգամ չեն հաջողի։ Ազգային ժողովի «Քաղաքացիական պայմանագիր» խմբակցության մի քանի, առավելապես տարեց և փորձառու պատգամավորների ուսերին է դրված «Հայաստան» և «Պատիվ ունեմ» խմբակցությունները պառակտելու, որոշ պատգամավորների իրենց կողմը գրավելու պարտականությունը։

Ի վերջո, Փաշինյանի թիմը չունի ԱԺ-ում անհրաժեշտ 2/3-ը՝ սահմանադրական օրենքներում իրենց ցանկալի փոփոխություններն իրականացնելու համար։ Եվ այս պայմաններում Նիկոլ Փաշինյանը մարտի է նետում «ծանր հրետանուն»։ ԱԺ Պաշտպանության և անվտանգության հարցերի հանձնաժողովի նախագահ Անդրանիկ Քոչարյանն է երեկ՝ հայտնի միջադեպերից հետո ելույթ ունեցել, և փորձել առանձնացնել ՀՅԴ-ական պատգամավորներին «Հայաստան» դաշինքի մյուս գործընկերներից։ Նա, անդրադառնալով ընդդիմադիրներին, ասել էր․

««Հայաստան» դաշինքը մտածելու բան ունի, որովհետև «Հայաստան» դաշինքը միայն ՀՅԴ-ն չէ, որն, ըստ էության, տեսանելի քաղաքական օրակարգի շուրջ է փորձում տեսակետներ ասել։ Այստեղ կա հայտնի քոքերը մաշեցնող լիդերի ներկայությունը՝ Ռոբերտ Քոչարյանի, որի կողմից պարոն գեներալ-գնդապետը նշանակվել է «Հայաստան» խմբակցության ղեկավար։ Կա նաև Քոչարյանի փաստաբանը, պարոն Արմեն Գևորգյանը։ Պրոցեսներ են գնում»։

Փաստացի, այս արտահայտությունը նշանակում է, որ իշխանականները փորձում են ՀՅԴ-ին առանձնացնել, սիրաշահել, դաշնակցականներին խոստումներ և հաճոյախոսություններ շռայլելով՝ պառակտել ընդդիմադիր գլխավոր դաշինքը։ Վստահաբար, այս անգամ ևս Նիկոլ Փաշինյանի մտահղացումը չի աշխատի, ՀՅԴ-ական պատգամավորները երեկ հավասարը հավասարի «կռվում« էին Ազգային ժողովի առաջնագծում, հարվածներ ստանում իշխանական պատգամավորներից, որոնք չէին խորշում ծեծել նաև ԱԺ փոխնախագահ Իշխան Սաղաթելյանին։

Լևոն Նիկողոսյան