Ուտող-ուրացողները․ ովքե՞ր են Նիկոլ Փաշինյանի հենարանը
ՎԵՐԼՈՒԾՈՒԹՅՈՒՆՆԵՐ
Ազգային ժողովում «Քաղաքացիական պայմանագիր» խմբակցության կազմը վկայում է՝ Նիկոլ Փաշինյանի թիմում տեղ գտնելու համար պետք է ուրանալ սեփական անցյալը, մարդկանց հետ կիսած հացը, և հանուն իշխանությանը ծառայելու տրորել սեփական ինքնասիրությունը։ Փաշինյանի սրտի օլիգարխ Խաչատուր Սուքիասյանը հազվադեպ է խոսում ամբիոնից, սակայն ամեն անգամ ապացուցում է վերոնշյալ ճշմարտությունը։ Երեկ էլ նա, Փաշինյանին հաճոյանալու մղումներով տարված, արտահայտություններ է արել Լևոն Տեր-Պետրոսյանի, Վազգեն Սարգսյանի, Սերժ Սարգսյանի մասին, որոնց օրոք էլ նրա բիզնեսը ծաղկել և բարգավաճում էր։
«Բոլորդ լավ գիտեք՝ երրորդ նախագահը 100 միլիոն դոլարից ավելի գումար կազինոներում կրվել է, նույն Բադեն-Բադեններում: Երրորդ նախագահը եկել է Հայաստան, պարոն Օհանյանը լավ գիտի, կոշիկներից մեկը մյուսից մի համար մեծ է եղել»,- պնդել էր Սուքիասյանը։ «Լայնամասշտաբ կոռուպցիա է եղել, մի մարդ է որոշել` ով ինչ անի, հիմա եկել, ինչն եք պաշտպանում»,- ասել էր Խաչատուր Սուքիասյանը, ով, ի դեպ, անձամբ էր հրավիրում Սերժ Սարգսյանին իր հերթական բիզնեսի բացմանը։
Նախկին իշխանությունների օրոք մամուլը տասնյակ անգամներ գրել է, թե ինչպես է նույն այդ Սուքիասյանը «Անի» հյուրանոցում սրճում Սերժ Սարգսյանի եղբոր՝ Սաշիկ Սարգսյանի հետ։ Այսօր, երբ այլևս կարիք չունի հաճոյանալու Սերժ Սարգսյանին, Սուքիասյանը նոր տեր ու հովանավոր է գտել։
Նոր տերեր են գտել նաև «Քաղաքացիական պայմանագրի» այլ պատգամավորներ ևս։ ԱԺ երեք պատգամավորներ՝ Արթուր Հովհաննիսյանը, Հայկ Կոնջորյանը, Արեն Մկրտչյանը մինչև հեղափոխությունն աշխատում էին «Հայաստան» խմբակցության պատգամավոր Վահե Հակոբյանի կնոջը պատկանող լրատվամիջոցներում։ Հակոբյանի կինը նրանցից հատկապես առաջին երկուսին` Արթուրին և Արենին, բարձր վարձատրել է, տարբեր առիթներով նվերներ արել, անգամ իր անձնական միջոցներով Արթուր Հովհաննիսյանին, օրինակ, ընտանյոք հանդերձ ուղարկել է ծով` հանգստանալու: Այսօր այդ նույն պատգամավորները իրենց ժամանակին կերակրած անձի` Վահե Հակոբյանի հասցեին հայհոյանքներ էին հնչեցնում, հարձակվում նրա վրա, որ խփեին:
«Էն Արթուրիկը, որ կա, իրա վրա, որ տիկինս ձայն էր բարձրացնում, ինքը արտասվում էր»,- երեկ ստիպված էր արձանագրել Վահե Հակոբյանը: Ահա այսպիսի անձանցով է իրեն շրջապատել Նիկոլ Փաշինյանը, որոնք հանուն իշխանական լափամանի պատրաստ են ուրանալ իրենց սեփական անցյալը, ձեռք բարձրացնել իրենց սնած մարդկանց վրա։
Դավիթ Խաչիկյան
