Թոշակառուների թոշակն ուտելը հայրենիքի դավաճանություն է

«Բոլոր այն պաշտոնյաները, ում ժամանակ յուրացրել են թոշակառուների փողերը, հայրենիքի դավաճաններ են։ Դա բոլոր ժամանակների մասին է»,- այս արտահայտությունը չէր կարող անել Ազգային ժողովի պատգամավոր, «Շիշ բռնող» մականունով հայտնի Հայկ Սարգսյանը։ Հիշեցնենք, որ այսօր Ազգային ժողովում բավական թեժ է եղել, իրար վրա շշեր են նետել, բանը հասել է ծեծկռտուքին։ «Քաղաքացիական պայմանագիր» խմբակցության պատգամավոր Հայկ Սարգսյանն Ազգային ժողովի ամբիոնից դավաճաններ անվանեց բոլոր ժամանակների պաշտպանության այն նախարարներին, ում օրոք զանգով, կամ փողով բանակից մարդիկ են ազատվել։

«Այն տեմպերով, ինչ տեմպերով զարգացել է բանակը 2018 թվականից հետո, եթե այդ նույն տեմպերով զարգանար 2008 թվականից հետո, նման աղետալի հետևանք, համոզված եմ տեղի չէր ունենա, մենք կունենայինք ավելի քան 10 տարի պատրաստվելու համար։ Հիմա ես պաշտոնապես հայտարարում եմ՝ բոլոր այն Պաշտպանության նախարարները, ում ժամանակ փողով բանակից մարդ է ազատվել, կամ զանգով, նրանք հայրենիքի դավաճաններ են։ Դա բոլոր ժամանակների մասին է», - հայտարարեց Սարգսյանը։

Դահլիճից արձագանքեցին, Սարգսյանն էլ, ի պատասխան, բղավեց․ - «Ես քե՞զ եմ ասում, արա»: Դահլիճից ջրի շշեր նետեցին Սարգսյանի ուղղությամբ, խորհրդարանի խոսնակ Ալեն Սիմոյանը ներս հրավիրեց անվտանգության աշխատակիցներին, իսկ ընդմիջմանը ընդհարումներ եղան դահլիճում։ Հայկական բանակում ծառայություն չանցած Հայկ Սարգսյանը, օրինակ, երբեք չէր անդրադառնա թոշակառուների թոշակների յուրացման փաստին։ Նա որդին է հայտնի Զարեհ Սարգսյանի, ով 1996թ․ նշանակվել էր ՀՀ սոցիալական ապահովության նախարարությանն առընթեր կենսաթոշակային վարչության պետ։ 1997թ. վերջին հիշյալ վարչությունն առանձնացվեց նախարարությունից, դարձավ առանձին կառույց ու վերանվանվեց որպես կենսաթոշակային հիմնադրամ։ Պետը դարձյալ Զարեհ Սարգսյանն էր, որն այդ պաշտոնում շարունակեց մնալ մինչև 2000թ. սեպտեմբեր ամիսը։ Զարեհ Սարգսյանին հետո հեռացրին պաշտոնից, քրեական գործ հարուցեցին խոշոր յուրացումների համար, տևական ժամանակ էլ նա անցկացրեց ազատազրկման մեջ։ Եվ այսօր առնվազն տարօրինակ է, որ այդպիսի հետագիծ ունեցողների՝ ծառայությունից խուսափած և նոր իշխանության սիրելիները դարձած զավակները դեռ համարձակվում են խորհրդարանի ամբիոնից ուրիշներին դասեր տալ։

Արսեն Երեմյան