Ինչպե՞ս դառնալ ռուսների ձեռնասուն խաղալիքը․ համառոտ ձեռնարկ Փաշինյանից
ՎԵՐԼՈՒԾՈՒԹՅՈՒՆՆԵՐ
Արցախյան 44-օրյա պատերազմում հայկական կողմից 3773 մարդ է զոհվել, 243 զինծառայողների գտնվելու վայրն անհայտ է։ Երեկ այդ մասին խորհրդարանի ամբիոնից հայտարարել է վարչապետ Նիկոլ Փաշինյանը։ Պատերազմում երկիրը խայտառակ հանգրվանի հասցրած, տնտեսությունը ոչնչացրած, ինքնիշխանությունը նվազեցրած և սեփական ժողովրդին ստորացրած Փաշինյանը մի շարք ուշագրավ հայտարարություններ է արել՝ պարտության մեղքը փորձելով բարդել նախկինների վրա։ Նա մասնավորապես հայտարարել է, թե մենք` որպես հանրություն, չենք ունեցել Լեռնային Ղարաբաղի հարցի կարգավորման ռազմավարություն: Տասնամյակներ շարունակ տարածաշրջանում հաջողությամբ խուսանավող և սեփական շահերը առաջ մղող իշխանություններին քննադատելը Փաշինյանի համար կենսական անհրաժեշտություն է դարձել։ Նա և իր կողմնակիցները առիթը բաց չեն թողնում նախկիններին մեղադրել բոլոր այն հանցագործությունների մեջ, որ իրենք են արել և պարտություն բերել երկրին։ Միաժամանակ, Փաշինյանն առանձնակի դրվատանքով է խոսում ՌԴ իշխանության, ռուս խաղաղապահների մասին։
Իշխանության գալով՝ նա լրջորեն վնասում էր հայ-ռուսական փոխգործակցությանը, իր անխոհեմ քայլերով վիրավորանք հասցնում Վլադիմիր Պուտինին, իսկ այսօր ընդգծում է` ռուս խաղաղապահներն այսօր Լեռնային Ղարաբաղում անվտանգության երաշխիք են, և Հայաստանը շարունակելու է ամրապնդել և ընդլայնել Ռուսաստանի հետ ռազմական, տնտեսական, քաղաքական հարաբերությունները։
«Պետք է ընդգծեմ այն առաձնահատուկ անձնական դերակատարումը, որ հայ-ռուսական հարաբերությունների զարգացման, մեր տարածաշրջանում անվտանգության և կայունության ապահովման, 44-օրյա պատերազմը կանգնեցնելու, մեր գերիների վերադարձի գործում խաղաղացել և խաղում է Ռուսաստանի Դաշնության նախագահ Վլադիմիր Պուտինը: Նախագահ Պուտինի անձնական ներգրավվածությունը և մեր միջև առկա վստահելի մթնոլորտը հայ-ռուսական հարաբերությունների արդյունավետությունը շարունակաբար բարձրացնելու գրավականն է»,- ասել է Փաշինյանը:
Մովսես Ուլիխանյան
