Կա սուտ, մեծ սուտ և էկոնոմիկայի նախարարության վերլուծություն
ՏՆՏԵՍՈՒԹՅՈՒՆ
Կա սուտ, մեծ սուտ և էկոնոմիկայի նախարարության վերլուծություն։ Վերջինը ստի գերադրական աստիճանն է, երբ հանրությանը կերակրում են կեղծ թվերով, խաբում, թե երկրում տնտեսական զարգացում կա։ Հայաստանի էկոնոմիկայի նախարարությունը հաղորդագրություն է տարածել և «ավետել», որ Հայաստանում ընթացիկ տարվա երկրորդ եռամսյակում արձանագրվել է 13% տնտեսական աճ։ Ազգային վիճակագրական կոմիտեի տվյալները նշելիս նախարարոթյունը, սակայն, մոռացել է մի «չնչին» մանրուք շեշտել, թե որ ժամանակահատվածի համեմատությամբ է այդ տնտեսական աճը։ Իսկ սովորաբար համեմատությունն արվում է նախորդ տարվա համապատասխան ժամանակահատվածի հետ։ Եթե համեմատում ենք 2020թ երկրորդ եռամսյակի հետ, կարող ենք միանգամից արձանագրել էկոնոմիկայի նախարարության փնթի մանիպուլյացիան, քանի որ 2020թ երկրորդ եռամսյակում Հայաստանում տոտալ լոքդաուն էր հայտարարված, այսինքն տնտեսությունը փաստացի զրոյի վրա էր:
Վահան Քերոբյանի գլխավորած հիմնարկի այս պահվածքն այնքան արտառոց է, որ նույնիսկ Փաշինյանի մերձավոր շրջապատի տնտեսագետներն են զարհուրել։ «Իմ քայլը» խմբակցության նախկին պատգամավոր, տնտեսագետ Արտակ Մանուկյանը ստիպված է եղել պարզաբանում ներկայացնել «Ֆեյսբուք» սոցիալական ցանցում, նաև պարզաբանել, թե ինչու հարցազրույց չի տալիս այդ թվացյալ տնտեսական աճի վերաբերյալ։
«Արդյո՞ք դա թույլ է տալիս խոսել տնտեսության լիարժեք վերականգնման մասին։ Իհարկե՝ ոչ, քանի որ չմոռանանք, որ համեմատվում ենք 2020թ. ցածր բազայի հետ ու դա նույնն է, որ ասենք 2021թ. երկրորդ եռամսյակում Հայաստան է ժամանել 152739 զբոսաշրջիկ ու դա համեմատենք երկրորդ եռամսյակում ժամանած 0-ին ձգտող զբոսաշրջիկների թվի հետ ու փաստենք, որ արձանագրվել է 100000-ապատիկ աճ զբոսաշրջիկների մասով։ Ըստ այդմ եռամսյակային վերլուծություններն ընթերցողի մոտ թյուր կարծիք կարող են ստեղծել՝ ընդհուպ մինչև էյֆորիկ»,- նշել է Մանուկյանը։
Իսկ մենք հերթական անգամ ընդգծենք, որ Հայաստանի կառավարությունը անխղճաբար խաբում է, ցինիկաբար ստում սեփական ընտրողներին։ Այլ բան չէինք էլ սպասում նրանցից։
Վարդգես Գասպարյան
