Ոստիկանն այլևս մերը չէ՞

«Ոստիկանը մերն է»,- այսպես էր հնչում 2018թ․ իշխանափոխության ամենահայտնի կարգախոսներից մեկը։ Ոստիկանական ամենաթողությունից զայրացած ժողովուրդը ոտքի էր կանգնել, մերժում էր նախկին իշխանություններին, անկեղծորեն հավատում, որ ոստիկանն էլ է իրենը, իշխանավորն էլ, վարչապետն էլ։ Անցել է երեք տարի, և արձանագրենք, որ ոստիկանությունը մնացել է նույնը, իշխանության մահակը, վարչապետի խամաճիկն ու ապօրինությունները պարտակողը, սեփական ժողովրդին ծեծողը։

Երևանի Ալիխանյան եղբայրներ փողոցի 6/1 հասցեում, առավել հայտնի որպես «Ֆիզգորոդոկ», երեկ, քաշքշուկ է եղել քաղաքացիների և ոստիկանների միջև։ Իրավիճակն այնքան լարված է եղել, որ միջադեպից հետո, երբ պարեկային ծառայողների մեքենան արագ ընթացքով տեղից հեռացել է, բնակիչները հետևից վանկարկել են «թուրքեր»։ Տարեցներին, կանանց քաքշքշել ու հարվածել են, մի քանիսին բերման են ենթարկել։ Այդ տարածքում այս օրերին ընթանում են բարձրահարկ շենքի կառուցման շինաշխատանքներ, սակայն բնակիչները պնդում են, որ գործընթացը հակաօրինական է։ Իշխանական լրատվամիջոցները, Հանրային հեռուստաընկերությունը բառ անգամ չեն հայտնել այդ քաքշքշուկի մասին, ասես՝ ոչինչ էլ չի եղել։ Իսկ իրավապահները բավական ագրեսիվ ու կոպիտ են վարվել տարածքի բնակիչների նկատմամբ, որոնք ընդամենը ցանկանում էին դադարեցնել ապօրինի շինարարությունը, պահանջում էին, որ քաղաքապետը կամ որևէ իրավասու պաշտոնյան ներկայանա և պարզաբանի, թե ինչու են շինարարության թույլտվություն տվել։

Նիկոլ Փաշինյանի ոստիկանությունը ոչնչով չի տարբերվում հին ոստիկանությունից, երբեմն էլ գերազանցում վատ իմաստով։ Փաշինյանն ու իր թիմն արդեն իշխանության ղեկին են, երկու ամիս առաջ էլ հաղթել են խորհրդարանական արտահերթ ընտրություններում, ընտրողներին սիրաշահելու, օրենքի ու իրավունքի մասին գեղեցիկ խոստումներ տալու կարիք չունեն։ «Օրենքի դիկտատուրա» սիրելի արտահայտությունից էլ արդեն դուրս է մնացել «օրենք» բառը։

Վարդան Նիկողոսյան