«Քաղաքացիական պայմանագիրը» դեմ չէ սահմանի հարցով լսումներին, միայն փակ ռեժիմով

Ազգային ժողովում իշխանական խմբակցությունը վերջապես որոշեց ընդունել ընդդիմության պահանջն ու քննարկումներ կազմակերպել սահմանային իրավիճակի վերաբերյալ։ Առաջարկով երեկ արտահերթ նիստի սկզբում հանդես էր եկել «Հայաստան» խմբակցության ղեկավար Սեյրան Օհանյանը, նշել, որ քննարկումները կարելի է իրականացնել փակ կամ բաց ռեժիմով։

«Սահմանային իրավիճակի վերաբերյալ իրարամերժ տեղեկություններ են գալիս, եկեք քննարկում կազմակերպենք, հասկանանք իրավիճակը, փարատենք հասարակության մտահոգությունները»,- ասել էր Օհանյանը:

Մինչև օրվա վերջ իշխանությունն այդպես էլ որևէ պատասխան չէր տվել, և միայն խմբակցության քարտուղար Արծվիկ Մինասյանի հարցապնդումից հետո ԱԺ նախագահ Ալեն Սիմոնյանը հայտնեց, որ «Հայաստան» խմբակցության առաջարկն ընդունվել է։ «Քաղաքացիական պայմանագիր» խմբակցության ղեկավար Հայկ Կոնջորյանն էլ նշեց, թե քննարկումը տեղի կունենա օգոստոսի 18-ին, և փակ ռեժիմով։ Քննարկումների մասին օրվա վերջին հայտնելով՝ իշխող թիմը, թերևս, ակնկալում է, որ դրանց քիչ թվով ընդդիմադիր պատգամավորներ կմասնակցեն։ Իսկ փակ ռեժիմով քննարկման դեպքում հանրությունը չի տեսնի իշխանականների վարքը, ականատես չի լինի ընդդիմության ճնշմանը։

Ընդհանրապես, «Քաղաքացիական պայմանագիրն» ու իր ղեկավարությունը ամեն ինչ անում են, որպեսզի սահմանային իրավիճակից, Ադրբեջանի հոխորտանքներին չարձագանքելու մասին իրենց վարքից խորհրդարանում քիչ խոսեն։ Դա փաշինյանականների ամենաթույլ տեղն է, չունեն պատասխաններ ո՛չ հանրությանը հուզող հարցերի վերաբերյալ, ո՛չ թշնամուն պատասխանելու համար։ Իսկ ընդդիմությունը, անգամ փակ ռեժիմով քննարկումներին մասնակցելով, պարտավոր է տեղեկացնել հանրությանը, թե ինչպես են անցել քննարկումները, ինչպես են իրենց պահել իշխանական պատգամավորները՝ իհարկե չբացահայտելով ռազմական գաղտնիքները։

Օնիկ Ամիրխանյան