Երեք ամիս առանց արտգործնախարարի․ Փաշինյանն այդպես էլ չի կողմնորոշվում

Հայաստանի Հանրապետությունն արդեն երեք ամիս ապրում է առանց արտգործնախարարի։ Արա Այվազյանը ԱԳ նախարարի պաշտոնից հրաժարական տվեց մայիսի 27-ին, նրանից հետո հրաժարականի դիմումներ ներկայացրին իր երեք տեղակալները, իսկ Արմեն Ղևոնդյանը իշխանության խնդրանքով մնաց պաշտոնավարելու։ Այս ընթացքում միայն հուլիսին է նախարարի առաջին տեղակալ նշանակվել՝ Անվտանգության խորհրդի նախկին քարտուղար Արմեն Գրիգորյանը։ Նախարարի և երեք տեղակալների պաշտոնները դեռեւս թափուր են մնում, իսկ այդ հանգամանքը կազմալուծում է Հայաստանի դիվանագիտական գերատեսչության աշխատանքը։

Տևական ժամանակ ԶԼՄ-ները գրում են, թե Փաշինյանը մտմտում է՝ ո՞ւմ նշանակել նախարարի պաշտոնում, Արարատ Միրզոյանի՞ն, թե՞ Արմեն Գրիգորյանին, իսկ Փաշինյանը, կարծես, չի էլ շտապում։ Մինչ այդ Գրիգորյանն իր մտերիմներին է բերում ԱԳՆ համակարգ, պաշտոնների նշանակում, ղեկավարում իրականացնում։ Հայաստանի կառավարության ողջ կազմը գրեթե նշանակված է, բացառությամբ՝ ԱԳ նախարարի։ Մինչդեռ, արցախյան պատերազմում կրած պարտությունից և սպասվելիք բանակցություններին ընդառաջ դա կարևորագույն պաշտոնն է երկրում՝ վարչապետի պաշտոնից հետո։ Միգուցե Նիկոլ Փաշինյանը չի կարողանում համաձայնեցնել նոր նախարարի նշանակումը Ռուսաստանի հետ։ Հայտնի է, որ թե՛ Գրիգորյանը, թե՛ Արարատ Միրզոյանը բավական ուշագրավ հակառուսական անցյալ ունեն, որքան էլ այսօր փորձեն սիրաշահել ռուսներին։ Այդուհանդերձ, ԱԳ նախարարի և տեղակալների պաշտոնների դատարկությունը լրջագույն վնաս է հասցնում երկրի վարկին ու հեղինակությանը, իսկ կադրային դիվանագետներն էլ չեն շտապում ընդունել պաշտոնի առաջարկները՝ հասկանալով, թե որքան բարդ աշխատանք է սպասվում իրենց։

Կորյուն Հակոբյան