Ալիևին պատասխանելու փոխարեն Փաշինյանը ձերբակալում է կանանց
ՎԵՐԼՈՒԾՈՒԹՅՈՒՆՆԵՐ
Երեկ Հայաստանի ապագայի հետ առնչվող երկու իրադարձություններ տեղի ունեցան, որոնք միայն առաջին հայացքից կարող են իրար հետ կապ չունենալ։ Ադրբեջանի նախագահ Իլհամ Ալիևը Քարվաճառ էր այցելել, որտեղ հերթական հոխորտանքներն է երկնել, հայտարարել է, թե Սյունիքն ու Սևանն ադրբեջանական տարածքներ են, և Ադրբեջանը դրանք այսպես կոչված «Զանգեզուրի միջանցքի» միջոցով անպայման կվերադարձնի։ Նա նաև հայտարարել է, թե Սյունիքում գտնվող Սև լիճը ադրբեջանական տարածք է և ընդհանրապես ադրբեջանցիները որտեղ կուզեն, այնտեղ էլ կտեղակայեն իրենց զորքերը։
«Մենք կանգնած ենք այն վայրում, որտեղ որ պետք է, և եթե ցանկանանք, կկանգնեն այն տեղերում, որտեղ կուզենք», - հայտարարել է Ալիևը:
Ադրբեջանի նախագահին այդ հարցում աջակցում է ոչ այլ ոք, քան ՀՀ վարչապետի աթոռը զբաղեցնող Նիկոլ Փաշինյանը։ Վերջինիս հրահանգով կալանավորված են Սյունիքի չորս խոշոր քաղաքների քաղաքապետերը, սակայն դա, ըստ Փաշինյանի, բավարար չէ։ Սյունիքը դեռ ունի թշնամուն դիմակայելու ռեսուրս, որը Փաշինյանը մտադիր է ջլատել մինչև վերջ՝ շարունակելով իր՝ բարոյականության բոլոր սահմանները հատող բռնաճնշումները։ Քննչական կոմիտեն երեկ ձերբակալել է Գորիսի փոխքաղաքապետեր Իրինա Յոլյանին և Մենուա Հովսեփյանին։ Փոխքաղաքապետերից բացի ձերբակալվել են նաև Գորիսի համայնքապետարանի 2 աշխատակիցներ՝ Արմինե Չոփչյանը և Սուսաննա Սարգսյանը: Պատերազմի ողջ ընթացքում առաջնագծում կռիվ տված Գորիսի քաղաքապետ Առուշ Առուշանյանը կալանավորված է, իսկ թիկունքը պահող նրա տեղակալներին կալանավորվելու միջնորդություն է ներկայացված դատարան։ Իրինա Յոլյանը և Մենուս Հովսեփյանը ձերբակալվել են առանձնապես խոշոր չափերով յուրացումներ կատարելու կասկածանքով։ Ընդ որում, ըստ Քննչականի կոմիտեի, Մենուա Հովսեփյանը կասկածվում է նաև ընտրական չարաշահումների մեջ։
Սյունիքը թուլացնելու իր հրեշավոր մտադրության մեջ Նիկոլ Փաշինյանը չի խորշում անգամ կանանց հետապնդելուց, քաշքշելով ձերբակալելուց, հրապարակային, որպեսզի ընդդիմադիրները վախենան, չփորձեն դիմադրել Հայաստանի դեմ իր ծրագրած դավադրությանը։ Իսկ սեփական դեմքն ու ինքնասիրությունը կորցրած իրավապահները կատարում են նրա ապօրինի հրահանգները։ Մինչդեռ այդ նույն Փաշինյանը բառ անգամ չի հանդգնել պատասխանել Ալիևի հոխորտանքներին, դարձել է նրա խամաճիկը, ոտատակ տվել երկրի արժանապատվությունը։
Մովսես Սարիբեկյան
