Գագիկ Ջհանգիրյանի առաջին պարտությունը

Նախկին զինդատախազ, տխրահռչակ Գագիկ Ջհանգիրյանը Բարձրագույն դատական խորհրդի նախագահի պաշտոնակատարի պաշտոնում իր առաջին լուրջ պարտությունն է կրել։ Թեպետ նրա ուսերին է դրված անհնազանդ դատավորներին պատժելու գործը, սակայն Ջհանգիրյանը ձախողում է այդ պարտականությունը։ Գաղտնիք չէ, որ Նիկոլ Փաշինյանի իշխանությունը ցանկանում է ամեն գնով ազատվել անհնազանդ դատավորներից, իսկ Քոչարյանի գործով իշխանության սրտին անհաճո որոշում կայացրած դատավորներն առաջին շարքում են։ Նախօրեին Բարձրագույն դատական խորհուրդը որոշում է կայացրել, որ Մարտի 1-ի գործի քննության ժամանակ նախկին նախագահ Ռոբերտ Քոչարյանին կալանքից ազատած և գործի վարույթը կասեցնելու որոշում կայացրած դատավոր Դավիթ Գրիգորյանը կարգապահական պատասխանատվության չի ենթարկվի։

 

Քոչարյանին ազատելուց հետո՝ 2019-ի հուլիսին, Երևանի ընդհանուր իրավասության դատարանի դատավոր Դավիթ Գրիգորյանի լիազորությունները դադարեցվել էին, նրան մեկ այլ գործով մեղադրանք էր առաջադրվել պաշտոնեական կեղծիքներ կատարելու համար։ Այս տարվա ապրիլին էլ Արդարադատության նախարարությունը դիմել էր Բարձրագույն դատական խորհրդին Գրիգորյանին կարգապահական պատասխանատվության ենթարկելու համար։ Պատճառը Քոչարյանին առաջադրված մեղադրանքը հակասահմանադրական ճանաչելու մասին Գրիգորյանի հարցազրույցն էր։ Դավիթ Գրիգորյանին կարգապահական պատասխանատվության չեն ենթարկի, մերժման որոշման տակ ստորագրել են Բարձրագույն դատական խորհրդի 4 դատավոր-անդամները և գիտնական-անդամներից մեկը՝ Գրիգոր Բեքմեզյանը: Հենց վերջինիս ստորագրությունն էլ որոշիչ է եղել, քանի որ մյուս 3 գիտնական-անդամները՝ Գագիկ Ջհանգիրյանը, Դավիթ Խաչատրյանը և Վիգեն Քոչարյանը մերժման որոշման տակ չեն ստորագրել։ Ըստ էության, Ջհանգիրյանին չի հաջողվել իրականացնել Փաշինյանի սրտի ուզածը, ԲԴԽ դատավոր անդամները անկախ վարք են դրսևորում, իսկ գիտնական անդամներից մեկն էլ, որին, ի դեպ, նշանակել էին Փաշինյանի օրոք, չի կարողացել դեմ գնալ իր խղճին և օրենքին։ Արդյունքում, Ջհանգիրյանը ստիպված է լինելու լսել Փաշինյանի գազազած գոռգոռոցները։