Ադրբեջանը մեծացնում է ճշումը, իսկ իշխանությունը թքած ունի

Հայ-ադրբեջանական սահմանին երեկ լարված է եղել գրեթե բոլոր ուղղություններով։ Ադրբեջանական զինուժը սադրանքի էր դիմել Սյունիքի մարզի, մասնավորապես` Սև լճի հատվածում` փորձելով դիրքային առաջխաղացում ապահովել։ Երասխի հատվածում հակառակորդի դիպուկահարի կրակոցից զոհվել էր 1975թ. ծնված, ավագ ենթասպա Վահան Դիմիկի Թաթոսյանը, իսկ ժամը 18:10-ի սահմաններում, ադրբեջանական ԶՈւ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ: Ծավալված ինտենսիվ փոխհրաձգության հետևանքով հակառակորդի կրակոցից մահացու հրազենային վիրավորում է ստացել ՀՀ ԶՈւ N զորամասի զինծառայող, 2002թ. ծնված, շարքային Արման Հովհաննեսի Հակոբյանը:

Մարդու իրավունքների պաշտպան Արման Թաթոսյանն էլ կեսգիշերին մոտ հաղորդեց, թե ադրբեջանական զինված ուժերն ուղիղ նշանառությամբ կրակում են Գեղարքունիքի մարզի Կութ և Նորաբակ գյուղերի վրա: Ռազմական փորձագետ, ԱԺ պատգամավոր Տիգրան Աբրահամյանն ահազանգ է հնչեցնում՝ Ադրբեջանն աստիճանաբար կրակի ուղղությունը փոխում է դեպի բնակավայրեր՝ փորձելով մեծացնել ճնշումը։ Սա ենթադրում է, որ իրավիճակին համահունչ գործողություններ պետք է իրականացնել։ Օրեր առաջ ՀԱՊԿ գլխավոր քարտուղարի հետ հանդիպմանը պաշտպանության նախարար Արշակ Կարապետյանը խրոխտ հայտարարություններ էր անում, թե հայկական կողմը չի հանդուրժելու նման պահվածքը, պաշտպանելու է ՀՀ սահմաններն ու անվտանգությունը։ Մինչդեռ պատերազմում կրած խայտառակ պարտությունից անցել է 9 ամիս, Սյունիքի և Գեղարքունիքի մարզի մի շարք բնակավայրեր հայտնվել են սահմանամերձի կարգավիճակում, սակայն սահմաններն ամրացնելու ուղղությամբ որևէ քայլ այդպես էլ չի արվել։

Մեկ այլ խայտառակ իրավիճակ է հանրությանը մատուցվող տեղեկատվության առումով։ Մեծ հավանականությամբ, ադրբեջանական սադրանքների մասին հայ հանրությունը տեղեկություններ կարող է ստանալ գյուղապետերից կամ Մարդու իրավունքների պաշտպանից, քան պատկան գերատեսչություններից։ Հայաստանի ապիկար և արկածախնդիր իշխանությունների միակ մտածելիքը պաշտոնների բաժանումն ու թիմակիցների համար «պադավատ» ապահովելն է, իսկ սահմանային միջադեպերի, յուրաքանչյուր օր նոր զոհերի մասին տեղեկություններն արդեն սովորական բան են դարձել։

Ռազմիկ Իսպիրյան