Հայաստանի իշխանությունները շարունակում են անլուրջ պահվածք դրսևորել Իսրայելի հարցում

Նիկոլ Փաշինյանի գլխավորած իշխանությունը շարունակում է անլուրջ պահվածք դրսևորել Իսրայելի հարցում։ 
44-օրյա պատերազմում Իսրայելը ահռելի աջակցություն ցուցաբերեց Ադրբեջանին։ Խաղաղության խնդիրների ուսումնասիրության միջազգային ինստիտուտի (SIPRI) տվյալներով՝ 2016-2020 թվականներին Ադրբեջանն իր զենքի 69 տոկոսը գնել է Իսրայելից, 17 տոկոսը՝ Ռուսաստանից։ Նույն թվականներին Իսրայելի սպառազինությունների ընդհանուր արտահանման 17 տոկոսը բաժին է ընկել Ադրբեջանին։

Պատերազմից 9 ամիս անց էլ, իսրայելական լրատվամիջոցների փոխանցմամբ, ադրբեջանական իշխանությունները բանակցություններ են վարում Իսրայելի հետ 2 մլրդ դոլարի սպառազինություններ գնելու շուրջ։ Իսրայելական ընկերությունները բոլոր ոլորտներում ՝ անվտանգությունից մինչև գյուղատնտեսություն, զգալի մասնակցություն են ունենում Արցախի՝ Ադրբեջանի կողմից օկուպացված տարածքներում իրականացվող շինարարական աշխատանքներին։

Մինչդեռ Հայաստանը որևէ կերպ չի ակտիվացնում աշխատանքը իսրայելական ուղղությամբ, Հայաստանի դեսպանությունն էլ ջանքեր չի գործադրում Իսրայելում հայ համայնքի և հայամետ կեցվածք ունեցող գործիչների հետ աշխատելու ուղղությամբ։ Միայն օրեր առաջ Իսրայելում ՀՀ դեսպանի պաշտոնից հետ կանչվեց Արմեն Սմբատյանը։ Տևական ժամանակ անգործության մատնված դեսպանին այդպես էլ չէի կարողանում հետ կանչել, ինչը ծայրահեղ անհրաժեշտություն էր։ Առայժմ հայտնի չէ, թե ում են մտադիր նշանակելու դեսպանի պաշտոնում։ 
ՀՀ ԱԳՆ-ն պարտավոր է Իսրայելում դեսպան նշանակել երիտասարդ, հիպերակտիվ, բանիմաց և կադրային դիվանագետի, որը կկարողանա իր անձնական որակներով ճեղքել հայ-իսրայելական հարաբերություններում առկա խնդիրները, այլ ոչ թե դեսպանի աթոռը կօգտագործի միայն իր անձնական կարիքների համար։

Ցոլակ Մխոյան