Նիկոլ Փաշինյանը հուշիկ քայլերով գնում է դեպի բռնապետություն

Նիկոլ Փաշինյանի իշխանութունը հուշիկ քայլերով գնում է դեպի բռնապետություն, սակայն սովորույթի համաձայն՝ բռնապետության տնազ է ստանալու։ Սյունիքը կանգնել է «Քաղաքացիական պայմանագրի» կոկորդին, Փաշինյանի գլխավորած քաղաքական ուժը որևէ կերպ չի կարողանում մարսել ո՛չ «սյունյանց ողջույնը», ո՛չ էլ Սյունիքում ստացած ցածր քվեները։ Կալանավորելով Գորիսի ու Քաջարանի քաղաքապետերին՝ Մեղրիի ու Սիսիանի նախկին քաղաքապետերին՝ Փաշինյանն այժմ էլ ցանկանում է պաշտոնանկ անել Կապանի քաղաքապետ Գևորգ Փարսյանին և արտահերթ ընտրությամբ իր «սրտի թեկնածուին» դարձնել քաղաքապետ։

2018թ․՝ հեղափոխական վերելքի օրերին անկուսակցական Փարսյանին հաջողվեց ցնցող հաղթանակ տանել ՔՊ-ական թեկնածու, ներկայումս փոխմարզպետ Նարեկ Բաբայանի նկատմամբ։ Փաշինյանի իշխանությունն այդ պարտությունը ներկայացնում էր որպես ժողովրդավարության հաղթանակ։ Գևորգ Փարսյանն էլ մեծ հեղինակություն է վայելում Կապանում, իսկ պատերազմում կրած պարտությունից հետո հանդգնել էր խստորեն քննադատել Նիկոլ Փաշինյանին։ Այսօր այլևս ժողովրդավարությունը իշխանական թրենդի մեջ չէ, միակ ցանկությունը ընդդիմադիր և անհնազանդ համայնքապետերից ազատվելն է, ընդ որում՝ հնարավոր ու անհնար բոլոր ապօրինի միջոցներով։

Օրերս Սյունիքի մարզկենտրոն Կապանի ավագանու 15 անդամներից 8-ը հրաժարական են ներկայացրել և առաջիկայում պետք է նշանակվեն ավագանու արտահերթ ընտրություններ։ Բանն այն է, որ Կապանում այլևս քաղաքապետ պետք է ընտրվի ոչ թե մեծամասնական, այլ համամասնական ընտրակարգով՝ ավագանու անդամներից։ Իշխանությունը նույնիսկ նախընտրելի թեկնածու ունի՝ ԱԺ պատգամավոր դարձած Դավիթ Դանիելյանը։ Նա հայտնի է որպես վարչապետի աշխատակազմի ղեկավար Արայիկ Հարությունյանի մտերիմ ընկեր, իսկ իր աշխատանքային կենսագրությունը սկսել է միայն այս իշխանության օրոք։ Եղել է ԿԳՄՍ նախարարի, ապա Պետական վերահսկողական ծառայության ղեկավարի օգնական, արտահերթ ընտրություններում էլ «Քաղաքացիական պայմանագրի» ցուցակով պատգամավոր է ընտրել։ Դե ինչ, հերթական անգամ արձանագրենք այս իշխանության խոսքի և գործի անհամապատասխանությունը, և ժողովրդավարության կարգախոսների անվան տակ դեպի բռնապետության ձգտումը։

Վահե Բաբայան