Արշակ Կարապետյանը ողջ թափով լծվել է բանակը գեներալներից մաքրելու գործին
ՎԵՐԼՈՒԾՈՒԹՅՈՒՆՆԵՐ
Հայաստանի պաշտպանության նորանշանակ նախարար Արշակ Կարապետյանը ողջ թափով լծվել է բանակը հակաիշխանական տրամադրություններ ունեցող գեներալներից զտելու, անհնազանդներին պատժելու, իսկ զինված ուժերն էլ Ռուսաստանի վերահսկողության տակ դնելու գործին։ Նիկոլ Փաշինյանի իշխանությունը չի կարողանում մարսել այս տարվա փետրվարի 25-ին ՀՀ ԳՇ բարձրաստիճան զինվորականների հայտարարությունը։
«Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին: Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը: Բանակը միշտ եղել է ժողովրդի հետ, ինչպես ժողովուրդն է բանակի հետ»,- ասված էր հայտարարության մեջ։
Մինչ օրս Փաշինյանն ազատվել է ԳՇ պետ Օնիկ Գասպարյանից, նրա տեղակալներ գեներալ-լեյտենանտ Տիրան Խաչատրյանից, գեներալ-լեյտենանտ Կարեն Աբրահամյանից։ Ստեփան Գևորգյանն ազատվել է գլխավոր շտաբի օպերատիվ գլխավոր վարչության պետի առաջին տեղակալի պաշտոնից, Վալերիկ Քոչարյանն ազատվել է զինված ուժերի պատրաստության գլխավոր վարչության մարտական պատրաստության վարչության պետի պաշտոնից: Իրենց պաշտոններից ազատվել են ինժեներական զորքերի պետ Իշխան Մաթևոսյանը, հակաօդային պաշտպանության զորքերի պետ Արմեն Վարդանյանը, հետախուզության գլխավոր վարչության պետ-Հայաստանի Հանրապետության զինված ուժերի գլխավոր շտաբի պետի տեղակալ Առաքել Մարտիկյանը, 3-րդ բանակային կորպուսի հրամանատար Գրիգորի Խաչատուրովը, զորամասերի և զորամիավորումների հրամանատարներ, այլ բարձրաստիճան զինվորականներ։
Շատերն էլ հարկադրված են եղել հավատարմության նոր երդումներ տալ վարչապետին ու պաշտպանության նոր նախարարին։ Մեր տեղեկություններով զինված ուժերում զտումները շարունակվելու են, սա է հենց Արշակ Կարապետյանի առջև դրված գլխավոր խնդիրը։ Պաշտպանության նախարարի երկրորդ կարևոր գործն էլ Հայաստանի զինված ուժերը վերափոխելն ու ռուսական բանակին համապատասխանեցնելն է։ ՌԴ պաշտպանության նախարարն օրերս հայտարարեց, թե իր երկիրը պատրաստ է օգնել Հայաստանին՝ ՀՀ զինված ուժերի արդիականացման և բարեփոխումների իրականացման համար։
«Եթե ՀՀ իշխանությունն ընդունել է առաջարկը, ապա գոնե հիմնական գծերով պարզ է, թե ինչ մոդելով է վերակառուցվելու բանակը, ինչ սպառազինությամբ է համալրվելու և այլն։ Սրան զուգահեռ ունենք Նիկոլ Փաշինյանի առաջարկը ՌԴ-ին՝ ամբողջությամբ ապահովելու ՀՀ սահմանների պահպանությունը, ինչն իրավիճակային պատկերն ամբողջական է դառնում։ Տպավորություն ունեմ, որ Հայաստանը պատրաստվում է անվտանգության բլոկի կառավարման հսկիչ փաթեթը փոխանցել ՌԴ-ին»,- արձանագրել էր ԱԺ պատգամավոր, անվտանգային հարցերի փորձագետ Տիգրան Աբրահամյանը։
Սամվել Զաքարյան
