Նիկոլ Փաշինյանի կառավարությունը մտադրություն չունի վերականգնելու հայկական բանակը
ՔԱՂԱՔԱԿԱՆՈՒԹՅՈՒՆ
Երեկ Մոսկվայում կայացել է ՀՀ պաշտպանության նախարար Արշակ Կարապետյանի և ՌԴ պաշտպանության նախարար, բանակի գեներալ Սերգեյ Շոյգուի հանդիպումը։
Այս թեմայով զրուցել ենք քաղաքագետ Անդրեաս Ղուկասյանի հետ։
Հարցին, թե քաղաքագետն ինչպես է գնահատում ՊՆ նախարարների հանդիպումը` Անդրեաս Ղուկասյանը ասել է․ «Տեսանելի է, որ ՆԱՏՕ-ի որոշումից հետո, որի համաձայն Ռուսաստանը պետք է իր զորքերը հեռացնի Մոլդովայից, Վրաստանից և Ուկրաինայից, որից հետո էլ մի քանի պետություն դիմեցին ՌԴ-ին՝ պահանջելով հետ ճանաչել Աբխազիայի և Հարավային Օսիայի անկախությունը, Ռուսաստանն ու ՀԱՊԿ-ը փորձում են հիմա իրենց ուժերը վերադասավորել ու դիմադրություն ցուցաբերել ՆԱՏՕ-ի, Եվրամիության և ԱՄՆ-ի ջանքերին, որոնք շատ ակտիվ հարձակում են սկսել Ռուսաստանի դեմ։ Մոսկվայում, կարծես թե բացահայտել են, որ հարկավոր է Հայաստանի բանակը արդիականացնել, ինչը, անկեղծ ասած, գնահատում եմ որպես կարգախոսային հայտարարություններ, որովհետև իրականում Ռուսաստանն այս ոլորտում չի կարող Հայաստանի համար որևէ առարկայական օժանդակություն ցուցաբերել»։
Հարցին, թե ռուսական սահմանապահների ավելացումը ՀՀ տարածքում ինչի՞ է հանգեցնելու` Անդրեաս Ղուկասյանը պատասխանել է․ «Դա պայմանավորված է հայկական բանակի կազմալուծման գործընթացով։ Նիկոլ Փաշինյանի կառավարությունը մտադրություն չունի վերականգնելու հայկական բանակը, գտնում են, որ անվտանգությունը պետք է հանձնել ռուսական կողմին։ ՌԴ-ն նման քաղաքականություն իրականացրել է Աբխազիայում, Հարավային Օսիայում, որտեղ իրենք փոխարինեցին ազգային զինված ուժերին։ Այդ քաղաքականության նպատակն է հասնել այնպիսի վիճակի, որ հսկողության տակ վերցնեն տվյալ պետության անվտանգության ողջ հարցերն ու դրանով քաղաքական հսկողություն ունենան այդ պետության վրա։ Հիմա դա, ըստ էության, իրականացվում է Հայաստանում, և այս առումով ենթադրել, որ այս կառավարության օրոք մենք ազգային բանակ կստեղծենք՝ հիմնազուրկ է։ Ռուսաստանի մոտ էլ այսօր կա խնդիր՝ ի՞նչ անել, երբ Հայաստանի անզորությունը հասել է անտրամաբանական մակարդակի»։
Սոնա Գիշյան
