Սուրեն Պապիկյանն ավերակների է վերածել իր նախկին գերատեսչությունը

Սուրեն Պապիկյանն ավերակների է վերածում իր նախկին գերատեսչությունը։ Փոխվարչապետ նշանակվելու համար, ինչպես գրում էին ԶԼՄ-ները, Պապիկյանը պահանջել էր, որ իր վերահսկողության տակ թողնեն Տարածքային կառավարման և ենթակառուցվածքների նախարարության ամենակարևոր ոլորտը։ Ի վերջո, կառավարությունը օգոստոսի 6-ին կայացած նիստում որոշեց «Ճանապարհային դեպարտամենտ» ՊՈԱԿ-ը վերակազմակերպել որպես «Ճանապարհային դեպարտամենտ» հիմնադրամ, հաստատեց հիմնադրամի կանոնադրությունը։ Համաձայն հիմնադրամի կանոնադրության՝ հիմնադրամի կառավարման բարձրագույն և հսկողություն իրականացնող մարմինը հոգաբարձուների խորհուրդն է, որի նախագահը փոխվարչապետ Սուրեն Պապիկյանն է:

Գաղտնիք չէ, որ այս իշխանությունը երեք տարի շարունակ ամենաշատը փիառվել է հենց արված ասֆալտի հաշվին։ Բացի այդ, ասֆալտապատումն այն ոլորտն է, որտեղ ամենաշատ գումարներն են ծախսում, և այդ ոլորտի վերահսկումը Պապիկյանը չէր կարող թողնել այլ նախարարի իրավասության ներքո։ Սուրեն Պապիկյանը, կառավարության շենք տեղափոխվելով, անմիջապես ազատվել է Տիգրան Ավինյանի ամբողջ գրասենյակից։ Ավինյանի աշխատակիցներին ազատել են, մի քանիսին էլ նշանակելու են Մհեր Գրիգորյանի գրասենյակում։ Փոխարենը Սուրեն Պապիկյանն իր թիմն է բերում տարածքային կառավարման նախարարությունից։ Այդ նախարարության նախկին գլխավոր քարտուղար Համլետ Բատիկյանին նշանակել են Պապիկյանի գրասենյակի ղեկավար, նախկին փոխնախարար Կարեն Իսախանյանին էլ՝ երեկ նշանակել են փոխվարչապետի խորհրդական։

Մեր տեղեկություններով Սուրեն Պապիկյանը ցանկանում է իր անմիջական վերահսկողության տակ պահել մարզպետներին, այժմ դրա օրենսդրական հնարավորություններն են քննարկում։ Ըստ էության Գեղարքունիքի նախկին մարզպետ Գնել Սանոսյանը նախարար է նշանակվել մի գերատեսչությունում, որը Պապիկյանը պարզապես «թլպատել» է։ Իսկ այժմ էլ Սուրեն Պապիկյանը փորձում է իր ձեռքը վերցնել մյուս գերատեսչությունները ևս, անձամբ լուծել կադրային հարցերը, ֆինանսական յուղոտ ոլորտներն էլ իրենով անել։ Թե ինչպես կաշխատի նախկինում իր ղեկավարած նախարարությունը, նոր «սուպեր փոխվարչապետին» բոլորովին չի հուզում։

Էդուարդ Դալլաքյան