Թուրքիայում սաստկանում են հրդեհներն ու հակահայկական հռետորաբանությունը
ՎԵՐԼՈՒԾՈՒԹՅՈՒՆՆԵՐ
Մինչ հայ հանրությունն ուրախանում է Թուրքիայում մոլեգնող անտառային հրդեհների կապակցությամբ, թուրքական իշխանությունները սաստկացնում են իրենց հակահայկական հռետորաբանությունը։ Թուրքիայի համար լրջագույն վտանգ հանդիսացող անտառային հրդեհների ֆոնին երեկ տեղի է ունեցել Թուրքիայի անվտանգության խորհրդի հերթական նիստը, իսկ տարածված պաշտոնական հաղորդագրության մեջ հրդեհների մասին կա ընդամենը մեկ կարճ անդրադարձ։ Դրան զուգահեռ Անվտանգության խորհրդի հայտարարության մեջ տեղ է գտել Հայաստանի հասցեին հերթական սպառնալիքը։
«Հայաստանը պետք է թողնի իր ագրեսիվ հռետորաբանությունը ու գործողությունները և գնահատի Հարավային Կովկասում տևական ժամանակ անց ստեղծված խաղաղության և կայունության հնարավորությունը։ Կոչ ենք անում Հայաստանի ղեկավարությանը հավատարիմ մնալ պայմանավորվածություններին և զարգացնել համագործակցությունը տարածաշրջանի երկրների հետ»,- ասվում է հայտարարության մեջ։
Թուրքագետ Վարուժան Գեղամյանի դիտարկմամբ, այսպիսի հռետորաբանությունը Թուրքիայի կողմից հուշում է, որ Հայաստանի դեմ նոր ճնշումներ են կիրառվում ու կիրառվելու։
«Կարելի է ենթադրել, որ այս անգամ ճնշումը միջանցքի հարցով է։ Անկախ ամեն ինչից, քանի Հայաստանի պետությունը թույլ է (առաջին հերթին՝ ազգային կառավարություն չունենալու պատճառով), այն շարունակելու է նման ճնշումների տակ լինել»,- նշել է թուրքագետը։
Հայ-ադրբեջանական սահմանային սրացումները, Հայաստանի գործող իշխանության կողմից պատշաճ արձագանքի ու հստակ գործողություններ բացակայությունը վկայում է, որ մեր երկիրը կանգնած է հերթական լրջագույն մարտահրավերի առաջ։ Թուրք-ադրբեջանական տանդեմը վստահ ձևակերպում է իր օրակարգը, քայլեր ձեռնարկում ընդդեմ Հայաստանի Հանրապետության։ Իսկ մե՞նք․․․ Իսկ մենք թիթեռ ենք նկարում։
Արմեն Երեմյան
