Արշակ Կարապետյանի սենսացիոն սայթաքումը

Վարչապետ Նիկոլ Փաշինյանը երեկ Պաշտպանության նախարարության աշխատակազմին և Զինված ուժերի բարձրագույն սպայակազմին է ներկայացրել նորանշանակ նախարար Արշակ Կարապետյանին: Ժամանակին խայտառակ կերպով հետախուզության վարչության պետի պաշտոնից ազատված Արշակ Կարապետյանն այսօր ՊՆ է մտնում որպես նախարար, և նրա գլխավոր խնդիրը պաշտպանական գերատեսչությունն ու զինված ուժերը Փաշինյանին անցանկալի տարրերից մաքրելն է լինելու։ Երեկ նորանշանակ նախարարը սենսացիոն մի «սայթաքում» է արել, որը խոսում է ՀՀ Զինված ուժերում ստեղծված իրավիճակի մասին։ Դիմելով Նիկոլ Փաշինյանին՝ Կարապետյանն ասել է․ «Պարոն վարչապետ, թույլ տվեք բոլորիս անունից՝ սկսած զինվորից, վերջացրած նախարարից, շնորհավորել Ձեզ վարչապետի պաշտոնը երկրորդ անգամ ստանձնելու և մեր ժողովրդից ստացած մանդատի կապակցությամբ: Ուզում եմ Ձեզ հավատացնել, որ մենք հասկանում ենք ստեղծված իրավիճակը, մենք հասկանում ենք, թե ինչ պայմաններում ենք ստանձնում այս պաշտոնները և չենք վերաբերվում դրանց որպես պաշտոն: Ես խոսել եմ Կորպուսի հրամանատարների հետ, որոնք մեզ լսում են, խոսել եմ Պաշտպանության բանակի հրամանատարի հետ»։

 

Նախարարի խոսքից կարելի է ենթադրել, որ կան կորպուսների հրամանատարներ, ովքեր «իրենց չեն լսում» և կան այնպիսիք, ովքեր լսում են։ Հիշեցնենք՝ Հայաստանի ԶՈՒ-ն ունի հինգ կորպուս։ Փաստացի, Արշակ Կարապետյանը կամա թե ակամա հաստատում է, որ բանակում կան բարձրաստիճան հրամանատարներ, ովքեր չեն լսում, չեն ենթարկվում։ Եվ այդպիսի հրամանատարներից ազատվելու համար էլ ՊՆ է գործուղվել Արշակ Կարապետյանը։ Նախկին նախարար Վաղարշակ Հարությունյանը չկարողացավ իրականացնել իր վրա դրված այդ «ցածր» առաքելությունը։ Պատերազմում կրած պարտությունից հետո մի քանի տասնյակ գեներալներ ու գնդապետներ միացան Նիկոլ Փաշինյանի հրաժարականի պահանջով հայտարարությանը, սակայն վարչապետին հաջողվեց ոչ միայն ջրել այդ հայտարարության հետևանքները, այլև այսօր ազատվում է իր ընդդիմադիրներից։ Նախօրեին էլ Հայաստանի Հանրապետության զինված ուժերի պատրաստության գլխավոր վարչության մարտական պատրաստության վարչության պետի պաշտոնից ազատվել է գեներալ-մայոր Վալերիկ Քոչարյանը։ Վարչապետ Նիկոլ Փաշինյանը երեկվա հանդիպմանը անձամբ է արձանագրել, որ Հայաստանի Հանրապետության շուրջ ունենք բավականին լարված իրավիճակ: Եվ այսպիսի լարված իրավիճակում անվանի ու հմուտ զորահրամանատարներից ազտավելը ոչ այլ ինչ է, քան դավաճանություն երկրի զինված ուժերի առջև։ Իսկ գործը Փաշինյանի սրտով անելու համար էլ նշանակվել է հենց Արշակ Կարապետյանը։