Նիկոլ Փաշինյանը շտապում է․ կառավարության ձևավորումն ընթանում է ողջ թափով

Նիկոլ Փաշինյանը, կարծես, կողմնորոշվել է գործադիր իշխանության պաշտոնների բաժանման հարցում։ 8-րդ գումարման ԱԺ առաջին նիստի օրը նախագահ Արմեն Սարգսյանը Փաշինյանին նշանակեց ՀՀ վարչապետի պաշտոնում։ Կայծակնային արագությամբ Փաշինյանը առաջարկություններ ներկայացրեց մեկ փոխվարչապետի և մի քանի նախարարների նշանակման համար։ Սուրեն Պապիկյանը նշանակվեց փոխվարչապետ, Արշակ Կարապետյանը՝ պաշտպանության, Ռոմանոս Պետրոսյանը՝ շրջակա միջավայրի, Նարեկ Մկրտչյանը՝ աշխատանքի և սոցիալական հարցերի, Գեղարքունիքի մարզպետ Գնել Սանոսյանն էլ՝ տարածքային կառավարման և ենթակառուցվածքների նախարարի պաշտոնում։

Մեր տեղեկություններով, այսօր ևս մի քանի նախարարներ էլ կնշանակվեն։ Ըստ էության, Նիկոլ Փաշինյանը շտապում է, թեև Սահմանադրության 150 հոդվածն ասում է, որ իր նշանակումից հետո վարչապետը հնգօրյա ժամկետում Հանրապետության նախագահին առաջարկում է փոխվարչապետների և նախարարների թեկնածուներին: Իհարկե, կառավարության արագ ձևավորումն անհրաժեշտ է բարեփոխումները հնարավորինս արագ սկսելու համար, սակայն բարդ է պատկերացնել, որ Նիկոլ Փաշինյանի գլխավորած իշխանությունը մտադիր է բարեփոխումներ իրականացնել, երկիրը դուրս բերել սոցիալական և տնտեսական անդունդից, ամրապնդել զինված ուժերն ու դիվանագիտական ճակատը։ «Իմ քայլը» խմբակցության նախկին ղեկավար Լիլիթ Մակունցին՝ ԵԱՀԿ Մինսկի խմբի առանցքային երկրում դեսպան, Արշակ Կարապետյանին՝ պաշտպանության նախարարի, իսկ Արմեն Գրիգորյանին՝ ԱԳ նախարար նշանակելու հանգամանքները որևէ հույս չեն թողնում, որ Նիկոլ Փաշինյանը ցանկանում է իրապես լուրջ և գործուն բարեփոխումներ իրականացնել։ Ընդհակառակը, միանգամայն վստահ ենք, որ «Քաղաքացիական պայմանագիրն» ու իր տխրահռչակ ղեկավարը բացառապես ամրապնդում են իրենց իշխանությունը՝ ընդդեմ Հայաստանի Հանրապետության։

Արմեն Նիկողոսյան