«Վերածնվող Հայաստանը» ներքաղաքական պայքարի առաջնագծում

«Վերածնվող Հայաստանը» նորաստեղծ քաղաքական ուժ է, բայց գործող իշխանությունների թիվ մեկ թիրախն է դարձել կարճ ժամանակում։ Պատերազմի ողջ ընթացքում Սյունիքի համայնքապետերը առաջնագծում էին՝ իրենց ջոկատների հետ միասին, մարտնչում էին ամենաբարդ հատվածներում։ Պարտությունից հետո միավորվելով «Վերածնվող Հայաստան» կուսակցության շարքերում՝ Վահե Հակոբյանի գլխավորությամբ, դարձան ընդդիմադիր հիմնական ուժի՝ «Հայաստան» դաշինքի առանցքը։ Այսօր, երբ խորհրդարանը առաջին նիստն է գումարել, այդ կուսակցության երկու պատգամավորներ գտնվում են անազատության մեջ, իսկ կուսակցությունը ենթարկվում է իշխանության տոտալ հարձակումներին, անթաքույց մաղձանետումներին, ոստիկանական տեռորին։

Մեղրիի նախկին քաղաքապետ Մխիթար Զաքարյանը, Սիսիանի նախկին քաղաքապետ Արթուր Սարգսյանը խորհրդարանում գրանցվելու, իրենց քաղաքական դիրքորոշումները ներկայացնելու փոխարեն Նիկոլ Փաշինյանի թեթև ձեռամբ գտնվում են ճաղերի ետևում, զրկվել են սահմանադրական իրավունքներն ու պարտականությունները իրացնելու հնարավորությունից։ Սա, թերևս, մեկ բացատրություն ունի. Վահե Հակոբյանն ու իր թիմակիցները պայքարի առաջնագծում են, և իշխանության նման ընդգծված վերաբերմունքը վկայում է՝ հենց նրանցից էլ Նիկոլ Փաշինյանի հիմնական վախն է։ Պետք է ըստ արժանվույն գնահատել, որ այս պայմաններում, դեգրադացիայի այս ժամանակներում «Վերածնվող Հայաստանը» բոլորի համար «քավության նոխազն» են դառնում՝ իրենց վրա են վերցնում կռիվը պատերազմի ժամանակ առաջին գծում, ապա և ներքաղաքական պայքարում։ Վստահ ենք, այս հարձակումներից «Վերածնվող Հայաստանը» դուրս կգա ավելի հզորացած և պինդ, իսկ իշխանականները կփոշմանեն, որ տրվել են ապօրինությունների մոլուցքին։

Մհեր Տիգրանյան