«Քաղաքացիական պայմանագրում» վեճերը միայն պաշտոնների բաժանման շուրջ են

«Քաղաքացիական պայմանագիր» կուսակցությունում պաշտոնների բաժանման հարցն ավելի բուռն են քննարկում, քան երկրի առջև ծառացած մարտահրավերները։ Հանգստյան օրերին իշխող ուժի խմբակցությունը բավական խառն է եղել, երկու օր Նիկոլ Փաշինյանի գլխավորությամբ նրանք քննարկել են, թե ով ինչ պաշտոն է ստանալու Ազգային ժողովում և գործադիրում։ Վաղուց հայտնի փաստ է, որ «Քաղաքացիական պայմանագիրը» միատարր զանգված չէ։ Նրանք միակամ են միայն մեկ հարցում՝ Նիկոլ Փաշինյանին անմռունչ ենթարկվելու, նրա բոլոր անհեթեթությունները արդարացնելու, ամեն գնով իրենց իշխանությունը երկարաձգելու հարցում։ Սակայն ոչ կոշտ են, երբ հարցը վերաբերում է ներիշխանական խմբավորումների ազդեցությանը։

Հատկապես բուռն է եղել պետաիրավական հարցերի հանձնաժողովի նախագահի ընտրությունը։ Դոնթի բանաձևն անիծելով՝ ՔՊ-ականները որոշել են, որ պիտի պահպանեն Պետաիրավական և Պաշտպանության ու անվտանգության հարցերի հանձնաժողովները։ Եթե Պաշտպանության հանձնաժողովի նախագահի հարցում կասկածներ չեն եղել, միաձայն ընտրվել է Անդրանիկ Քոչարյանը, ապա Պետաիրավական հարցերի հանձնաժողովի նախագահի ընտրությանը գործի են դրվել անգամ իրենց ձեռքին հայտնված կոմպրոմատները։ Այսպես կոչված «սորոսական» ձևը ամեն ինչ արել է Վլադիմիր Վարդանյանի ընտրությունը կանխելու, և իրենցից որևէ մեկին նշանակելու համար։ Ի վերջո, խմբակցությունը զայրացել է «սորոսականների» այս պահվածքից, Հերիքնազ Տիգրանյանի փոխարեն էլ որոշել են վերընտրել Վարդանյանին։ «Քաղաքացիական պայմանագրում» կարծում են, թե ԱԺ մի փոխնախագահի պաշտոնը վերջերս «սորոսական» դարձած Ռուբեն Ռուբինյանին հատկացնելը լիովին բավարար է, և մյուս հանձնաժողովներում ևս չեն ընտրել այդ թևի ներկայացուցչի։ Ի վերջո, գործին միջամտել է Նիկոլ Փաշինյանը, և առաջարկել ևս երկու հանձնաժողով ստեղծել, որոնցից մեկը Դոնթի բանաձևով կանցնի ընդդիմությանը, իսկ 13-րդ հանձնաժողովը կդառնա սոցիալական հարցերի հանձնաժողովը, որի նախագահ էլ կդառնա «սորոսական» ձևի ներկայացուցիչը։ Նշենք, որ այս պահին ԱԺ-ն ունի 11 մշտական հանձնաժողովներ, որոնցից ՔՊ-ին բաժին պիտի հասնի 9-ը, ընդդիմադիր «Հայաստան» դաշինքին՝ 2-ը։

Սարգիս Մխիթարյան