Ինչպե՞ս շեղել սեփական ժողովրդին․ ծանուցման փոխարեն նամակ ՄԱԿ ԱԽ նախագահողին

Հայ-ադրբեջանական սահմանին իրավիճակի սրման կապակցությամբ հանրության մի հատվածն օրեր շարունակ արդարացիորեն տարակուսում էր, թե ինչու Հայաստանի իշխանությունները չեն բարեհաճում պաշտոնապես դիմել ՄԱԿ Անվտանգության խորհրդին՝ ներկայացնելով շփման գիծ դարձած ՀՀ սահմանների նկատմամբ թշնամու ոտնձգությունները։ Ամենայն հավանականությամբ, Նիկոլ Փաշինյանը չի ցանկանում զայրացնել իր մոսկովյան տերերին, ՌԴ-ին և ՀԱՊԿ-ին, որոնց դուր չի գա նման քայլը։

 

Սակայն էլ ավելի բարդ է հանրությանը բացատրել ՄԱԿ ԱԽ չդիմելու հանգամանքը։ Ուստի և ՀՀ ԱԳՆ-ն փոքրիկ խորամանկություն է արել, որ ո՛չ շիշը վառի, ո՛չ քաբաբը։ ԱԳՆ-ն երեկ պաշտոնական հաղորդագրություն տարածեց, թե Միավորված ազգերի կազմակերպությունում Հայաստանի մշտական ներկայացուցիչ Մհեր Մարգարյանը նամակ է հղել ՄԱԿ-ի Անվտանգության խորհրդի հուլիս ամսվա նախագահող, ՄԱԿ-ում Ֆրանսիայի մշտական ներկայացուցիչ Նիկոլա Դե Ռիվիերին: Նամակում շեշտվում է, որ Ադրբեջանի ագրեսիվ գործողությունները Հայաստանի հանդեպ զուգորդվում են ամենաբարձր մակարդակով հնչող տարածքային պահանջներով, ռազմական գործողությունների սպառնալիքով, ազգային պատկանելության հողի վրա ատելության խոսքով։ Ընդգծվում է, որ Հայաստանը հաստատակամ է իր ինքնիշխանության ու տարածքային ամբողջականության ապահովման հարցում՝ օգտագործելու ինքնապաշտպանության օրինական իրավունքը՝ ՄԱԿ-ի կանոնադրության 51-րդ հոդվածի հիմքով։

 

 

Բնականաբար, այս նամակը ներկայացվելու է որպես ՄԱԿ դիմելու քայլ և ընդդիմախոսներին լռեցնելու «փաստարկ», մինչդեռ այդ նամակում բառ անգամ չկա գրած, թե ինչ է ՀՀ-ն ակնկալում ՄԱԿ ԱԽ-ից։ Փոխարենը, Հայաստանի իշխանությունները պետք է նամակ գրեին ոչ թե ՄԱԿ ԱԽ նախագահողին, այլև պաշտոնապես դիմեին ՄԱԿ ԱԽ, ներկայացնեին նաև, թե ինչ քայլեր են ակնկալում ԱԽ անդամներից։ Իսկ այսպես, ընդամենը թոզ են փչելու հանրության աչքին։