Համանախագահների հայտարարությունը՝ սառը ցնցուղ ՀՀ իշխանությունների համար

ԵԱՀԿ Մինսկի խմբի համանախագահները մի հարթության վրա են դնում ՀՀ ինքնիշխան տարածք մտած Ադրբեջանին և պատերազմում պարտություն կրած, ագրեսիայի զոհ Հայաստանին։ Համանախագահները երեկ հայտարարություն են տարածել, կոչ են արել «Հայաստանին և Ադրբեջանին անհապաղ ապաէսկալացնել իրավիճակը, զերծ մնալ սադրիչ հռետորաբանությունից և գործողություններից, ամբողջությամբ կատարել իրենց պարտավորությունները՝ համաձայն 2020թ նոյեմբերի 9-ի հայտարարության և հրադադարի վերաբերյալ համատեղ համաձայնեցված այլ պայմանավորվածությունների: Համանախագահները կրկին հայտարարում են հակամարտության համաձայնեցված, համապարփակ և կայուն կարգավորման անհրաժեշտության մասին և կողմերին կոչ են անում հնարավորինս շուտ վերադառնալ Համանախագահների հովանու ներքո ընթացող բանակցություններին»:

Ինչպես նկատեցիք, որևէ բառ չկա ադրբեջանական ագրեսիայի, ՀՀ ինքնիշխան սահմանները խախտելու մասին, փոխարենը Հայաստանին հավասար պատասխանատու են համարում իրավիճակի սրման մեջ։ ԵԱՀԿ ՄԽ համանախագահները երբեք էլ աչքի չեն ընկել օբյեկտիվությամբ, հայտարարություններն էլ արել են ուղղակի անելու համար, սակայն այս պահվածքը պարզապես ծաղր և վիրավորանք է ՀՀ իշխանությունների հանդեպ։ Վերջին օրերին հատկապես սրվել էին խոսակցությունները՝ ՄԱԿ ԱԽ դիմելու անհրաժեշտության, ԱՄՆ-ից կամ Ֆրանսիայից ռազմական օգնություն խնդրելու մասին, իսկ Ֆրանսիայի դեսպանի հայամետ մի հայտարարությունը՝ Հայաստանին ռազմական օգնություն հատկացնելու հարցը դիտարկելու մասին, ոգևորության ալիք էր բարձրացրել հանրության արևմտամետ հատվածի համար։ Փաստացի, ԵԱՀԿ Մինսկի խմբի համանախագահների հայտարարությունը սառը ցնցուղ էր։ Նրանք բառացի ասում են՝ մեզնից հույս չունենաք, ձեր գլխի ճարն ինքներդ տեսեք։ Համանախագահները, ի դեպ, հարկ չէին համարել տեղեկացնել, որ ղեկավար կազմում փոփոխություն է կատարվել։ Հայտարարությունը ՌԴ կողմից ստորագրել էր ոմն Իգոր Խովաև, թեև վերջին 11 տարիներին այդ պաշտոնը զբաղեցնում էր Իգոր Պոպովը։ Ահա այսպիսի անհարգալից վերաբերմունք ՀՀ իշխանության և ժողովրդի նկատմամբ։

Տիգրան Մարկոսյան