Մանկության ընկերներով դեպի պայծառ ապագա

Ազգային ժողովի աշխատակազմում կտրուկ փոփոխություններ են, Արարատ Միրզոյանի ընկերներին փոխարինում են Ալեն Սիմոնյանի ընկերները։ ԽԾԲ-ին ժամանակին դեմ արտահայտվող «Քաղաքացիական պայմանագիրը» վաղուց է ապացուցել, որ իրենց մոտ պաշտոնների նշանակումը մասնագիտական հմտություններով պայմանավորված չէ, այլ բացառապես այս կամ այն նիկոլականի՝ «խնամի-ծանոթ-բարեկամ» լինելու հանգամանքով։ Այդպես վարվել էր Արարատ Միրզոյանը՝ 2019թ․ ԱԺ նախագահ դառնալով, այդպես էլ վարվում է Ալեն Սիմոնյանը, որը նոր գումարման խորհրդարանում կփոխարինի Արարատ Միրզոյանին։ Վերջինս օրեր առաջ կարգադրություններ ստորագրեց՝ Արտակ Հովհաննիսյանին ազատելով Ազգային ժողովի աշխատակազմի արարողակարգի վարչության պետի պաշտոնից: Պաշտոնից ազատվել են նաև Ազգային ժողովի աշխատակազմի ղեկավար-գլխավոր քարտուղար Առնակ Ավետիսյանը, աշխատակազմի ղեկավարի տեղակալ Սամվել Մելիքսեթյանը՝ Միրզոյանի կուրսեցին, ԱԺ նախագահի խորհրդական Սյուզաննա Ավետիսյանը, ԱԺ նախագահի խորհրդական Վահան Կոստանյանը, Ազգային ժողովի նախագահի ռեֆերենտ Աշխեն Աբրահամյանը։

 

ԶԼՄ-ների տեղեկություններով՝ արդեն հայտնի է նաև, թե ով է փոխարինելու ԱԺ աշխատակազմի ղեկավար-գլխավոր քարտուղար Առնակ Ավետիսյանին՝ Ալեն Սիմոնյանի մանկության ընկեր Վահան Նարիբեկյանը։ Ճիշտ նույնպիսի սկզբունքով՝ բանակի, մանկության, կուրսի, նախկին աշխավայրի ընկերներով էլ «Քաղաքացիական պայմանագիրը» լրացնում էր իր պատգամավորական ցուցակը, կառավարության, մարզպետների, համայնքապետերի պաշտոնները՝ առանց հաշվի առնելու, որ այդ անձինք ուղղակի ընդունակություններ չունեն այդ պատասխանատու աշխատանքն անելու։ Որոշ դեպքերում նախկին ընկերները լքում էին իշխող ուժին և հանգրվանում քաղաքական հակառակորդների ճամբարներում, սակայն այդ դասն էլ չափազանց բարդ է Փաշինյանի ու նրա կողմնակիցների համար։ Իսկ վատ և անպատրաստ կադրերը մի օր անպայման պատուհաս են դառնում թե՛ իրենց նշանակողների, թե՛ պետության համար։