Նիկոլ Փաշինյանի իշխանությունը շարունակում է տառապել կադրային սովից
ՎԵՐԼՈՒԾՈՒԹՅՈՒՆՆԵՐ
Հայաստանի վարչապետի պաշտոնակատար Նիկոլ Փաշինյանը դեռևս չի կարողանում կողմնորոշվել, թե ինչպես լուծի իր կառավարության կադրային խնդիրները, իր կուսակիցների և արբանյակների միջև բաժանի բոլոր պաշտոնները, որպեսզի ծաղրի առարկա չդառնա հանրության շրջանում։ Իսկ կադրային սովն այնքան սուր է իշխող ուժի պարագայում, որ նրանք արդեն ոտուձեռ են ընկել, փորձում են նույնիսկ նախկինում պաշտոններ զբաղեցրածներին համոզել, որ վերադառնան իրենց ոլորտներ։
Լրջագույն խնդիրը շարունակում է մնալ տարածքային կառավարման նախարարության հարցը։ Սուրեն Պապիկյանը մեկ պայմանով է համաձայնվել տեղափոխվել փոխվարչապետի պաշտոնին։ Նա գնում է՝ իր հետ տանելով մարզպետների ղեկավարումը, և ամենայուղոտ ոլորտները, ինչպես ճանապարհաշինությունը։ Այս առումով, նախկինում սուպերնախարարության վերածված տարածքային կառավարման և ենթակառուցվածքների նախարարությունը հիմա էլ Պապիկյանի թեթև ձեռքով վերածվելու է ամուլ մի կառույցի, որի նոր ղեկավարը միայն կրելու է նախարարի պաշտոնը՝ զուրկ իրական լծակներից։ Բոլորովին զարմանալի չէ, ՔՊ առաջատար դեմքերը չեն ցանկանում զբաղեցնել այդ նախարարի պաշտոնը։ Նիկոլ Փաշինյանն այժմ քննարկում է տարածքային կառավարման նախարարի պաշտոնում Արմեն Փամբուխչյանին կամ նախկին պատգամավոր Վիկտոր Ենգիբարյանին նշանակելու հարցը, թեև Ենգիբարյանին փոխնախարարի պաշտոն են խոստացել այլ նախարարությունում։
Լուրջ խնդիրներ կան նաև էկոմոնիկայի և ֆինանսների նախարարությունների առումով։ Փաշինյանականները դժգոհ են Վահան Քերոբյանի աշխատանքից և սոցիալական ցանցերում անբռնազբոս վարքից։ ՊՔ վարչությունում ցանկանում են նաև ազատվել ֆինանսների նախարար Ատոմ Ջանջուղազյանից։ Վերջինս երեք տարում ատամներով է պաշտպանել նախարարությունը, թույլ չի տվել նիկոլական կադրերի մուտքը իր բոստան։ Փաշինյանականները 90-ականներից, թերևս, լավ են հիշում Վանո Սիրադեղյանի մի հայհոյախառն արտահայտությունը ֆիննախի մասին, որտեղ շրջանառվում է հիմնական փողը։ Եվ այժմ փողի նկատմամբ վերահսկողությունը ցանկանում են վերցնել Ջանջուղազյանի համար։ Այդ նախարարություններից մեկի համար նախատեսվում է Երևանի նախկին քաղաքապետ, Հայ ազգային կոնգրեսի հետ կապերը խզած Վահագն Խաչատրյանի թեկնածությունը։
Արտակ Գալյան
