«Դագդիգագան» մարտեր ՀՀ սահմանին․ նոր պատերազմի նախաշեմին

Ադրբեջանական զինված ուժերն այս գիշեր նախահարձակ մարտական գործողություններ է սկսել Հայաստանի Հանրապետության սահմանների վրա` Սոթքից մինչև Վերին Շորժա հատվածում։ Հայաստանի պաշտպանության նախարարությունը մի քանի հաղորդագրություններ է տարածել՝ նախ նշելով, թե հակառակորդը փորձում է բարելավել իր հենակետերը` ստեղծելով բարենպաստ պայմաններ առաջխաղացման համար։ Առավոտյան ժամը 8:30-ի դրությամբ պարզվեց, թե հայկական կողմն ունի երեք զոհ, ևս երկու զինծառայող վիրավոր են։ Իսկ մեկ ժամ անց նույն ՊՆ-ն նշեց, որ հայկական դիրքերի ուղղությամբ հարձակում նախաձեռնած ադրբեջանական ստորաբաժանումները, տալով կորուստներ, ետ են շպրտվել իրենց ելման դիրքեր։

Պաշտպանության նախարարության նախարարության հաղորդագրության մեջ էական և ուշագրավ մի հանգամանք կար, նշվում է, թե հակառակորդը նախահարձակ մարտական գործողություններ է սկսել Ռուսաստանի Դաշնության մայրաքաղաք Մոսկվայում նախատեսվող բանակցություններից առաջ։ Ռազմական փորձագետ Տիգրան Աբրահամյանի գնահատմամբ, սա կարևոր դետալ է հասկանալու, թե ինչ նպատակներ է հետապնդում Ադրբեջանը և ինչ քայլերի է պատրաստ դիմել:

«Ստացվում է, որ բանակցությունների սեղանին կա դրված փաստաթուղթ և իր ցանկալի արդյունքին հասնելու համար Ադրբեջանը դիմել է իր հայտնի գործիքակազմին՝ սահմանային լարվածություն, սադրանքներ, լոկալ մարտեր և այլն»,- նշել է Աբրահամյանը:

Փաստացի այս դրվագն ապացուցվում է նաև Ադրբեջանի ՊՆ պաշտոնական հաղորդագրությամբ։ «Պաշտպանության նախարարությունը կոչ է անում Հայաստանի ռազմաքաղաքական ղեկավարությանը զերծ մնալ սադրիչ գործողություններից՝ ուղղված իրավիճակի միտումնավոր սրմանը, և քաղաքակիրթ ձևով բանակցություններ սկսել պետական սահմանի դելիմիտացիայի վերաբերյալ»,- ասվում է Ադրբեջանի ՊՆ հայտարարության մեջ։

Ըստ էության, Հայաստանին ուժի գործադրմամբ և հետագա սպառնալիքով սահմանազատում է պարտադրվում։ Եվ Հայաստանի իշխանություններն առանձնապես դեմ չեն այսպիսի զարգացմանը։ Այլ կերպ հնարավոր էլ չէ բացատրել 44-օրյա պատերազմում պարտության սիմվոլ դարձած Արծրուն Հովհաննիսյանի հանկարծահաս ակտիվացումը սոցիալական ցանցերում։ «Դագդիգագան նահանջի», և «Հաղթելու ենք» կեղծ կարգախոսի հեղինակը վաղ առավոտից անցել է իր «սովորական» գործին։ Միակ հուսադրող հայտարարությունը Հայաստանի ԱԳՆ-ն է արել։

«ԱԳՆ–ից ընդգծում են, որ Ադրբեջանի կողմից Հայաստանի տարածքային ամբողջականության դեմ ուժի կիրառմանն ի պատասխան Հայաստանի Հանրապետությունը գործի կդնի միջազգային իրավունքով վերապահված իր ռազմաքաղաքական ողջ գործիքակազմը»,- ասված է ՀՀ ԱԳՆ հայտարարության մեջ։

Տիգրան Հակոբյան